Respublika bo‘ylab 6 ta hududda giyohvandlik bilan bog‘liq holatlar fosh etildi
Tezkor tadbirlarida 1,5 kilogrammdan ortiq marixuana, geroin hamda 900 dan ortiq kannabis o‘simligi aniqlanib, musodara qilindi.
Davlat xavfsizlik xizmati va Ichki ishlar vazirligi xodimlari hamkorligida "Xavfsiz va sog‘lom yurt" tezkor-profilaktik tadbirlari doirasida o‘tkazilgan reydlar davomida Namangan, Samarqand, Xorazm, Toshkent va Andijon viloyatlarida giyohvandlik vositalari hamda kannabis o‘simliklarini noqonuniy saqlash va yetishtirish bilan bog‘liq holatlar fosh etildi. Bu haqda DXX Zamon.uz' ga xabar berdi.
Namangan viloyatining Norin tumanida 1961-yilda tug‘ilgan fuqaroning xonadoni ko‘zdan kechirilganda, u sotish maqsadida saqlab kelayotgan 1 kilogramm 595 gramm marixuana protsessual tartibda musodara qilingan.
Chortoq tumanida esa 1973-yilda tug‘ilgan shaxs o‘ziga tegishli tomorqada 839 tup kannabis o‘simligini yetishtirib kelayotgani aniqlangan.
Samarqand viloyatining Urgut tumanida yashovchi 1995-yilda tug‘ilgan fuqaro Toyloq tumani hududida avtomashinasida harakatlanayotgan vaqtda to‘xtatilib tekshirilgan. Undan 20 gramm geroin ashyoviy dalil sifatida olingan.
Xorazm viloyatining Qo‘shko‘pir tumanida esa avval ham giyohvandlik vositalari savdosi bilan bog‘liq jinoyati uchun sudlangan 1962-yilda tug‘ilgan shaxs 36 tup kannabis o‘simligini yetishtirayotgani fosh etilgan.
Toshkent viloyatining Yangiyo‘l shahrida yashovchi, ilgari ham shu turdagi jinoyat uchun sudlangan 1973-yilda tug‘ilgan fuqaro o‘z hovlisida tashkil etilgan issiqxonada 22 tup kannabis parvarishlayotgani aniqlangan.
Shuningdek, Andijon viloyatining Qo‘rg‘ontepa tumanida istiqomat qiluvchi 1965-yilda tug‘ilgan shaxsning tomorqasidan 10 tup kannabis o‘simligi topilgan.
Hozirda mazkur holatlarning barchasi yuzasidan tergovga qadar tekshiruv ishlari olib borilmoqda.
