Damashqda Makron joylashgan mehmonxona yaqinida portlashlar yuz berdi

 

Suriya poytaxti Damashqda Fransiya prezidenti Emmanuel Makron tashrifi vaqtida ikkita portlash sodir bo‘ldi. Bu haqda mahalliy va xalqaro ommaviy axborot vositalari xabar berdi.

 

Dastlabki ma’lumotlarga ko‘ra, portlashlardan biri Suriya Turizm vazirligi binosi yaqinida, ikkinchisi esa Makron joylashgan Four Seasons mehmonxonasi atrofida yuz bergan.

 

Suriya Ichki ishlar vazirligi ma’lum qilishicha, hodisa oqibatida kamida 18 kishi jarohatlangan, ular orasida to‘rt nafar politsiya xodimi ham bor. Ayrim ommaviy axborot vositalari qurbonlar borligini ham xabar qilgan, biroq bu ma’lumot rasmiy idoralar tomonidan tasdiqlanmagan.

 

Dastlabki tergov ma’lumotlariga ko‘ra, portlashlarga ikkita qo‘lbola portlovchi qurilma sabab bo‘lgan. Huquqni muhofaza qiluvchi organlar hodisaga aloqador shaxslarni aniqlash bo‘yicha tergov harakatlarini boshlagan.

 

Suriya Ichki ishlar vazirligi portlashlar Makron joylashgan mehmonxona atrofida tashkil etilgan xavfsizlik zonasidan tashqarida sodir bo‘lganini hamda Fransiya prezidenti hayotiga xavf tug‘dirmaganini ma’lum qilgan.

 

Shuningdek, Fransiya tomoni Makronning hodisada jarohat olmaganini tasdiqlagan. Xabarlarga ko‘ra, portlash sodir bo‘lgan vaqtda prezident korteji mehmonxonani taxminan 15 daqiqa avval tark etgan bo‘lgan.

 

Ma’lum qilinishicha, portlashlar Fransiya prezidenti Emmanuel Makronning Suriyaga tashrifi dasturiga ta’sir ko‘rsatmagan. U rejalashtirilganidek Suriya Prezidenti Ahmad ash-Sharaa bilan muzokaralarni o‘tkazgan.