Jazoirning O‘zbekistondagi yangi elchisi tayinlandi
Baxtiyor Saidov yangi elchi Jamila Ashurdan ishonch yorliqlari nusxalarini qabul qildi. Tomonlar ikki davlat o‘rtasidagi hamkorlikni kengaytirish masalalarini muhokama qildi.
O‘zbekiston tashqi ishlar vaziri Baxtiyor Saidov Jazoirning O‘zbekistondagi yangi tayinlangan Favqulodda va muxtor elchisi Jamila Ashurdan ishonch yorliqlari nusxalarini qabul qildi.
Ma’lum qilinishicha, uchrashuvda O‘zbekiston va Jazoir o‘rtasidagi hamkorlikning bugungi holati hamda uni yanada rivojlantirish istiqbollari muhokama qilindi.
Tomonlar 2026-yil iyun oyida O‘zbekiston delegatsiyasining Jazoirga amalga oshirgan rasmiy tashrifi yakunlari va erishilgan kelishuvlarni amaliyotga tatbiq etish masalalari yuzasidan fikr almashdi.
Shuningdek, savdo-iqtisodiy, investitsiya, ta’lim, madaniyat va boshqa istiqbolli yo‘nalishlarda ikki tomonlama hamkorlikni faollashtirishga tayyorlik bildirildi.
Uchrashuv yakunida Baxtiyor Saidov Jamila Ashurga O‘zbekistondagi diplomatik faoliyatida muvaffaqiyat tiladi.
