JCH-2026: Argentina super kambek evaziga Misrni mag‘lub etib, chorak finalga yo‘l oldi
2:0 hisobida oldinda borayotgan Misr bahs so‘ngida g‘alabani qo‘ldan chiqardi.
Jahon chempionatining 1/8 final bosqichidan o‘rin olgan Argentina va Misr terma jamoalari o‘rtasidagi bahs muxlislarga haqiqiy dramani taqdim etdi. Ikki to‘p farqi bilan ortda borayotgan amaldagi jahon chempionlari uchrashuvni kambek bilan yakunlab, chorak final yo‘llanmasini qo‘lga kiritdi.
Bahsning 15-daqiqasida Ibrohim Misrni hisobda oldinga olib chiqdi. Ikkinchi bo‘limda Ziko mezbonlarning ustunligini yanada mustahkamladi. Shu tariqa, misrliklar 67-daqiqaga kelib 2:0 hisobida oldinda borayotgandi.
Argentina esa so‘nggi daqiqalarda o‘yinni butunlay o‘zgartirdi. 79-daqiqada Kristian Romero hisobni qisqartirdi. Oradan to‘rt daqiqa o‘tib, Lionel Messi muvozanatni tikladi. Asosiy vaqtga qo‘shib berilgan 90+3-daqiqada esa Enso Fernandes g‘alaba golini urib, argentinaliklarga 3:2 hisobidagi irodali g‘alabani taqdim etdi.
Qayd etish joiz, Messi uchrashuvning 21-daqiqasida penalti tepish imkoniyatiga ega bo‘lgan, biroq undan foydalana olmadi.
JCH-2026. 1/8 final
Argentina — Misr 3:2
Gollar: Romero 79, Messi 83, Enso Fernandes 90+3 — Ibrohim 15, Ziko 67.
Ushbu g‘alabadan so‘ng Argentina chorak final yo‘llanmasini qo‘lga kiritdi va ushbu bosqichda ular Kolumbiya — Shveysariya gʻolibiga qarshi maydonga tushadi.
