Surxondaryoda ikki ayolni fohishalik uchun Turkiyaga yubormoqchi bo‘lgan ayol ushlandi
Gumonlanuvchi jabrlanuvchilar uchun aviachiptalar xarid qilib, buning evaziga 6 ming AQSH dollari talab qilgan.
“Xavfsiz va sog‘lom yurt” oyligi doirasida Surxondaryo viloyati Ichki ishlar boshqarmasi Tezkor-qidiruv xizmati hamda uning hududiy bo‘linmalari xodimlari hamkorligida o‘tkazilgan tezkor tadbir davomida odam savdosi bilan bog‘liq jinoyat fosh etildi. Bu haqda Ichki ichlar vazirligi xabar berdi.
Aniqlanishicha, Angor tumanida 2005-yilda tug‘ilgan ayol moddiy manfaat evaziga ikki nafar ayolni fohishalik bilan shug‘ullanish maqsadida Turkiyaning Istanbul shahriga yuborishni rejalashtirgan.
Gumonlanuvchi jabrlanuvchilar nomiga Termiz–Istanbul yo‘nalishi bo‘yicha har biri 580 AQSH dollari qiymatidagi aviachiptalarni xarid qilgan. Buning evaziga esa kelgusida ulardan 6 ming AQSH dollari olishi kelishilgan.
Tezkor tadbir davomida gumonlanuvchi ikki nafar ayolni Termiz xalqaro aeroporti orqali Istanbulga jo‘natayotgan vaqtida ashyoviy dalillar bilan qo‘lga olingan.
Mazkur holat yuzasidan unga nisbatan Jinoyat kodeksining 135-moddasi ikkinchi qismi (odam savdosi) bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Ichki ishlar organlarining eslatib o‘tishicha, joriy yildan boshlab odam savdosi jinoyati uchun javobgarlik kuchaytirilib, ushbu jinoyatni sodir etgan shaxslarga 5 yildan 15 yilgacha ozodlikdan mahrum qilish jazosi belgilangan.
