Toshkentdagi qurilish obyektida beton plita bosib qolishi tufayli bir ishchi halok bo‘ldi
Yashnobod tumanidagi qurilish obyektida sodir bo‘lgan baxtsiz hodisa yuzasidan surishtiruv olib borilmoqda.
Toshkent shahrining Yashnobod tumanida joylashgan qurilish obyektlaridan birida sodir bo‘lgan baxtsiz hodisa oqibatida 25 yoshli ishchi vafot etdi. Bu haqda “Millar” dasturi xabar berdi.
Ma’lum qilinishicha, hodisa Olmos mahallasidagi qurilish maydonida yuz bergan. Dastlabki ma’lumotlarga ko‘ra, Surxondaryo viloyatida tug‘ilgan 25 yoshli yigitni beton plita bosib qolgan.
Guvohlarning aytishicha, hodisa ish jarayonida sodir bo‘lgan. Voqea haqida Favqulodda vaziyatlar xizmatiga xabar berilgan. Hodisa joyiga qutqaruvchilar va tez tibbiy yordam brigadasi yetib kelgan. Jabrlanuvchi kran yordamida chiqarib olingan.
Yashnobod tumani tez tibbiy yordam bo‘limi rahbari Sanjar Qodirovning ma’lum qilishicha, 3-iyul kuni qurilish obyektidan kelib tushgan chaqiriqqa asosan brigada zudlik bilan yetib borgan. Biroq voqea joyida erkak og‘ir tan jarohatlari oqibatida vafot etgani aniqlangan.
Hozirda hodisa yuzasidan surishtiruv ishlari olib borilmoqda. Qurilish obyektining hududi o‘rab qo‘yilgan.
