Biz bugun kechqurun Eronga qattiq zarba beramiz — Tramp

AQSH prezidenti Donald Tramp AQSH 8-iyul  oqshomida Eronga yana zarba berishi mumkinligini ma’lum qildi. Shu bilan birga, u AQSH va Eron o‘rtasida tuzilgan dastlabki sulh kelishuvi amalda yakunlanganini bildirdi. Bu haqda Reuters xabar berdi.

 

Qayd etilishicha, Anqarada bo‘lib o‘tayotgan NATO sammiti doirasida jurnalistlar bilan muloqot qilgan Tramp Eronni muzokaralar davomida erishilgan kelishuvlarga rioya qilmayotganlikda aybladi. Uning aytishicha, AQSH harbiylari avvalgi kuni Eron hududlariga zarba bergan va zarurat tug‘ilsa, yangi hujumlar ham amalga oshirilishi mumkin.

 

"Ularga kichik bir ogohlantirish beraman: bugun kechqurun qattiq zarba beramiz", — dedi Tramp Ukraina prezidenti Volodimir Zelenskiy bilan uchrashuvi oldidan.

 

Tramp avvalroq AQSH va Eron o‘rtasidagi dastlabki sulh uchun asos bo‘lib xizmat qilgan anglashuv memorandumi o‘z kuchini yo‘qotganini ham ma’lum qilgan. Uning ushbu bayonotlari ortidan jahon bozorida neft narxlari keskin oshdi.

 

Shu bilan birga, AQSH prezidenti Vashington Eron bilan yana to‘liq miqyosdagi urush boshlash niyatida ekanini tasdiqlamadi. Shuningdek, dastlabki sulhni doimiy kelishuvga aylantirish bo‘yicha muzokaralar davom etadimi yoki yo‘qmi, bu borada ham aniq izoh bermadi.

 

Tramp Eron hech qachon yadro quroliga ega bo‘lmasligi kerakligini yana bir bor ta’kidlab, bunga kelishuvsiz ham erishish mumkinligini aytdi.

 

So‘nggi keskinlashuv fonida Eron AQSHning Eron hududlariga bergan zarbalariga javoban Bahrayn va Quvaytdagi AQSH harbiy obyektlarini nishonga olganini ma’lum qildi. AQSH esa bu zarbalarni Hormuz bo‘g‘ozida tankerlar hujumga uchraganidan keyin amalga oshirganini bildirgan.

 

Mojaroning qayta avj olishi Hormuz bo‘g‘ozidagi xavfsizlik bilan bog‘liq xavotirlarni kuchaytirdi. Kema qatnovi ma’lumotlariga ko‘ra, kamida to‘rtta neft va gaz tankeri ushbu strategik suv yo‘lagi orqali harakatlanishdan voz kechib, ortga qaytgan.