Rossiya Starlinkni ishdan chiqarishga urinmoqda
Tahlilchilarga ko‘ra, agar Rossiya ishdan chiqaruvchi texnologiyalarni keng miqyosda joriy eta olsa, bu Ukraina dronlari orqali olib borayotgan amaliyotlarga sezilarli ta'sir ko‘rsatishi mumkin.
Rossiya armiyasi Ukraina tomonidan qo‘llanilayotgan uzoq masofali dronlar hujumini to‘xtatish maqsadida Ilon Maskning Starlink sun’iy yo‘ldosh internet tizimi signalini ishdan chiqarishga urinmoqda. Bu haqda Reuters Zaporijya viloyatida xizmat qilayotgan ukrainalik dron operatorlari va harbiy qo‘mondonlarga tayanib xabar berdi.
Ma'lumotlarga ko‘ra, Ukraina so‘nggi oylarda "o‘rta masofali zarba dronlari"dan foydalanishni sezilarli darajada kengaytirgan. Starlink orqali boshqariladigan ushbu apparatlar Rossiyaning front ortidagi ta'minot yo‘llari, yoqilg‘i omborlari, o‘q-dori tashuvchi yuk mashinalari va harbiy texnikalariga zarbalar bermoqda. Bu esa Rossiya logistikasiga jiddiy muammolar tug‘dirmoqda.
Shu sababli Rossiya elektron urush vositalarini faol qo‘llashni boshlagan. Ukrainalik harbiylarning aytishicha, rus qo‘shinlari Volna, Kupol va Garant kabi zamonaviy radioelektron kurash tizimlarini joylashtirib, Starlink signallarini bostirishga urinmoqda. Xususan, Ukraina Mudofaa vazirligi maslahatchisi Serhiy Beskrestnovning aytishicha, "Volna Kupol Garant" majmuasi taxminan 20 kvadrat kilometr hududda Starlink tarmog‘i ishlashiga xalaqit bera oladi.
Ukrainalik dron operatorlarining ta'kidlashicha, bunday tizimlar ayrim hududlarda dronlar bilan aloqani uzib qo‘yadi va ularning nishonga aniq zarba berishini qiyinlashtiradi. Shu bois Ukraina armiyasi ushbu radioelektron kurash majmualarini alohida nishon sifatida yo‘q qilishga harakat qilmoqda. Reuters bilan suhbatlashgan harbiylardan biri Rossiyaning Starlinkni bostirish tizimlari "eng ustuvor nishonlardan biri" ekanini aytgan.
Rossiya faqat elektron kurash bilan cheklanmayapti. Harbiylar dronlardan yashirinish uchun yoqilg‘i tashuvchi mashinalarni oddiy fuqarolik transporti ko‘rinishiga keltirmoqda, harbiy yuklarni oddiy yuk mashinalarida tashimoqda, ayrim hollarda esa mototsikl va kvadrosikllardan foydalanmoqda. Shuningdek, yoqilg‘i zaxiralari oddiy yoqilg‘i quyish shoxobchalari va vaqtinchalik yashirin joylarda saqlanayotgani aytilmoqda.
