Tramp Ispaniya bilan barcha savdo aloqalarini to‘xtatishni buyurdi
Vashington va Madrid o‘rtasidagi munosabatlar mart oyida Ispaniya hukumati AQSHga Rota va Moron qo‘shma harbiy bazalaridan foydalanishga ruxsat bermaganidan buyon yomonlashib kelmoqda.
AQSh prezidenti Donald Tramp NATO sammiti chog‘ida moliya vaziri Skott Bessentga Ispaniya bilan barcha savdo aloqalarini to‘xtatish bo‘yicha topshiriq berganini ma'lum qildi. Uning aytishicha, bunday qarorga Madridning NATO majburiyatlarini bajarmayotgani va AQSHning Eronga qarshi harbiy amaliyotlarini qo‘llab-quvvatlamagani sabab bo‘lgan, demoqda Reuters axborot agentligi.
Tramp Anqarada jurnalistlar bilan suhbatda Ispaniyani "NATOdagi dahshatli hamkor" deb atadi.
"Men moliya vaziriga Ispaniya bilan barcha savdo aloqalarini to‘xtatishni buyurdim. Biz ular bilan hech qanday savdo qilishni istamaymiz", dedi AQSH prezidenti.
AQSH prezidenti, shuningdek, Ispaniya alyansning mudofaa xarajatlarini yalpi ichki mahsulotning 5 foizigacha oshirish bo‘yicha yangi maqsadini qo‘llab-quvvatlamayotganini tanqid qildi. Trampning fikricha, NATOga a'zo barcha davlatlar mudofaa uchun teng darajada mablag‘ ajratishi kerak.
Vashington va Madrid o‘rtasidagi munosabatlar mart oyidan buyon keskinlashib bormoqda. O‘shanda Ispaniya hukumati AQSHning Eronga qarshi harbiy operatsiyalari uchun Rota va Moron qo‘shma harbiy bazalaridan foydalanishga ruxsat bermagandi. Keyinchalik Madrid AQSH harbiy samolyotlari uchun o‘z havo hududini ham yopgan edi.
Reuters ma'lumotiga ko‘ra, Pentagon avvalroq Ispaniyaga nisbatan qator bosim choralarini, jumladan, NATOdagi maqomini qayta ko‘rib chiqish ehtimolini ham muhokama qilgan. Biroq bu borada rasmiy qaror qabul qilinmagan.
Trampning yangi bayonoti AQSH va Eron o‘rtasidagi keskinlik yana kuchaygan bir paytda yangradi. AQSh 8-iyul kuni tongda Eron hududidagi 80 dan ortiq harbiy nishonga zarba bergan, bunga javoban Eron Bahrayn va Kuvaytdagi AQSH harbiy obyektlariga raketa hamda dronlar bilan hujum qilgan edi. Shu fon sabab NATO ichidagi kelishmovchiliklar yanada yaqqol namoyon bo‘lmoqda.
Hozircha Ispaniya hukumati Trampning savdo aloqalarini to‘xtatish haqidagi so‘nggi bayonotiga rasmiy munosabat bildirmagan.
