Bolalarga zo‘ravonlik qilgan pedagoglar bir yil bog‘chalarda ishlay olmaydi
Senat bolalarni zo‘ravonlikdan himoya qilish, aliment to‘lovlari va yetim bolalarni oilaga joylashtirish tartibini takomillashtiruvchi qonunni ma’qulladi.
Oliy Majlis Senatining 17-yalpi majlisida "Bolalarni ijtimoiy himoya qilish tizimi takomillashtirilishi munosabati bilan O‘zbekiston Respublikasining ayrim qonun hujjatlariga qo‘shimcha va o‘zgartirishlar kiritish to‘g‘risida"gi Qonun ko‘rib chiqilib, ma’qullandi.
Qayd etilishicha, keyingi yillarda mamlakatda bolalarning huquqlari, erkinliklari va qonuniy manfaatlarini ta’minlash, ularni har qanday zo‘ravonlik shakllaridan himoya qilish hamda ta’lim muassasalarida xavfsiz muhit yaratishga qaratilgan tizimli islohotlar amalga oshirilmoqda.
Yangi qonunga muvofiq, ta’lim tashkilotlarida tarbiya va ta’lim jarayonida voyaga yetmagan bolalarga nisbatan jismoniy zo‘ravonlik sodir etgan yoki ularni tahqirlagan shaxslar uchun Ma’muriy javobgarlik to‘g‘risidagi kodeksda alohida javobgarlik belgilanmoqda.
Shuningdek, pedagogik faoliyat davomida voyaga yetmaganlarga nisbatan jismoniy va (yoki) ruhiy zo‘ravonlikka oid huquqbuzarlik sodir etgani uchun ma’muriy javobgarlikka tortilgan shaxslar bir yil davomida maktabgacha ta’lim tashkilotlarida pedagogik faoliyat bilan shug‘ullanish huquqidan mahrum etiladi.
Bundan tashqari, davlat yoki nodavlat muassasasining toʻliq taʼminotida boʻlgan bola uchun ota yoki onani aliment toʻlashdan ozod qilishga yoʻl qoʻyilmasligi belgilanmoqda.
Shu bilan birga, yetim bolalar hamda ota-ona qaramog‘idan mahrum bo‘lgan bolalarni oilaga tarbiyaga berish tartibi ham takomillashtirilib, ular faqat o‘z qarindoshlariga tarbiyaga berilishi nazarda tutilmoqda.
Senatorlar ushbu qonun bolalarning huquq va qonuniy manfaatlarini yanada ishonchli himoya qilish, ta’lim muassasalarida ularning sha’ni, qadr-qimmati va daxlsizligini ta’minlash bo‘yicha huquqiy kafolatlarni mustahkamlashga xizmat qilishini ta’kidlab, hujjatni ma’qulladi.
