Omskdagi dron hujumlariga aloqamiz yo‘q — Qozog‘iston TIV
Tashqi ishlar vazirligi Omsk viloyatiga hujum qilgan dronlar mamlakat hududidan uchirilgani haqidagi xabarlarni rad etib, bunday da’volar hech qanday dalil bilan tasdiqlanmaganini bildirdi.
Qozog‘iston Tashqi ishlar vazirligi Rossiyaning Omsk viloyatiga hujum qilgan uchuvchisiz uchish apparatlari mamlakat hududidan uchirilgani haqidagi xabarlarni qat’iyan rad etdi.
Vazirlikning Tengrinews'ga ma’lum qilishicha, ayrim ommaviy axborot vositalari va ijtimoiy tarmoqlarda tarqalgan, dronlar Qozog‘iston hududidan uchirilgani hamda keyinchalik Rossiyaning Omsk viloyatiga zarba bergani haqidagi da’volar haqiqatga to‘g‘ri kelmaydi va hech qanday ishonchli dalil yoki faktlar bilan tasdiqlanmagan.
“Ushbu da’volar haqiqatga to‘g‘ri kelmaydi va hech qanday ma’lumot yoki faktlar bilan tasdiqlanmagan. Biz bunday xabarlarni Qozog‘iston va Rossiya o‘rtasidagi an’anaviy do‘stona munosabatlarni buzib ko‘rsatishga qaratilgan asossiz iddaolar deb hisoblaymiz. Ikki davlat o‘rtasidagi aloqalar keng qamrovli strategik sheriklik va ittifoqchilik ruhida izchil rivojlanmoqda”, — deyiladi vazirlik bayonotida.
Shuningdek, Tashqi ishlar vazirligi Qozog‘iston o‘z hududi, havo makoni va infratuzilmasidan boshqa davlatlarga qarshi qaratilgan har qanday harbiy yoki noqonuniy harakatlarni amalga oshirish uchun foydalanilishiga qat’iyan yo‘l qo‘ymasligini ta’kidlagan.
Vazirlik mamlakat xalqaro huquq normalariga rioya etishi, tinchlikparvar tashqi siyosat yuritishi hamda xalqaro va mintaqaviy xavfsizlikni ta’minlash bo‘yicha o‘z zimmasidagi majburiyatlarni izchil bajarib kelayotganini qayd etgan.
Eslatib o‘tamiz, 6-iyul kuni Rossiyaning Omsk viloyatida uchuvchisiz uchish apparatlari hujumi qayd etilgan edi. Viloyat gubernatori Vitaliy Xotsenkoning ma’lum qilishicha, bir nechta dron Omskning shimoliy sanoat hududiga yetib borgan, keyinchalik ularning neftni qayta ishlash zavodiga hujum qilgani bildirilgan. Rasmiy ma’lumotlarga ko‘ra, hodisa oqibatida qurbonlar bo‘lmagan, dronlarning aksariyati havo hujumidan mudofaa tizimlari tomonidan zararsizlantirilgan.
