Toshkentda Tailanddan olib kelingan 11 kilogramm narkotik aniqlandi
Qozog‘iston fuqarosi narkotik vositalarni tranzit yo‘li orqali yetkazib berishga uringan vaqtida qo‘lga olingan.
Respublika miqyosida o‘tkazilayotgan “Xavfsiz va sog‘lom yurt” keng qamrovli tezkor-profilaktik tadbirlarining ikkinchi bosqichi doirasida Davlat xavfsizlik xizmati hamda bojxona organlari hamkorligida yirik miqdordagi giyohvandlik vositasining noqonuniy aylanmasiga chek qo‘yildi. Bu haqda DXX ma'lum qildi.
Ma’lum qilinishicha, Toshkent shahrining Chilonzor tumanida o‘tkazilgan tezkor tadbir davomida 2004-yilda tug‘ilgan Qozog‘iston Respublikasi fuqarosining sport sumkasi belgilangan tartibda ko‘zdan kechirilgan.
Tekshiruv davomida sumka ichidan shirinliklar va boshqa mahsulotlar ko‘rinishida yashirilgan, umumiy og‘irligi taxminan 11 kilogramm bo‘lgan gashish moyi aniqlanib, ashyoviy dalil sifatida rasmiylashtirib olingan.
Dastlabki ma’lumotlarga ko‘ra, ushbu giyohvandlik vositasi Tailanddan olib kelingan bo‘lib, uni tranzit yo‘li orqali Qozog‘iston Respublikasiga yetkazib berish rejalashtirilgan.
Mazkur holat yuzasidan gumonlanuvchiga nisbatan jinoyat ishi qo‘zg‘atilib, ayni paytda tergov harakatlari davom ettirilmoqda.
