Eronda Ali Xomanaiyning dafn marosimi yakunlandi
Marhum Imom Rizo maqbarasiga dafn etildi, marosimga uning to‘ng‘ich o‘g‘li boshchilik qilgan.
Eron davlat teleradiokompaniyasi (IRIB) ma’lumotiga ko‘ra, sobiq oliy rahbar Ali Xomanaiy mamlakat shimoli-sharqidagi Mashhad shahrida joylashgan Imom Rizo maqbarasi hududiga dafn etildi.
Ko‘chalarda motam ishtirokchilari sonining juda ko‘pligi sababli marhumning tobuti dafn etiladigan joyga vertolyot orqali olib borilgan. Dafn marosimiga uning to‘ng‘ich o‘g‘li oyatulloh Mustafo Xomanaiy boshchilik qildi.
Shu bilan birga, Tehron, Qum hamda Iroqning shialar uchun muqaddas sanalgan Najaf va Karbalo shaharlarida bir hafta davom etgan motam tadbirlari ham yakunlangan. Mahalliy ommaviy axborot vositalari hisob-kitoblariga ko‘ra, xotira marosimlarida 41–43 million kishi ishtirok etgan.
86 yoshli Ali Xomanaiy 28-fevral kuni AQSH va Isroilning Eronga uyushtirgan hujumlarining birinchi kunida o‘z qarorgohiga berilgan zarba oqibatida halok bo‘lgan edi.
U 1981–1989-yillarda Eron prezidenti, 1989-yildan boshlab esa mamlakatning oliy rahbari lavozimida faoliyat yuritgan.
Xomanaiyning vafotidan so‘ng oliy rahbar lavozimini uning o‘g‘li Mojtaba Xomanaiy egallagani ma’lum qilingan edi. Rasmiy ma’lumotlarga ko‘ra, u tayinlanganidan buyon jamoatchilik oldida ko‘rinish bermagan.
