Fransiya Jahon chempionatining ilk yarim finalchisiga aylandi
Jamoa chorak finalda Marokashni 2:0 hisobida mag'lub etdi.
Fransiya terma jamoasi 2026-yilgi FIFA Jahon chempionatining chorak finalida Marokashni 2:0 hisobida mag‘lub etib, musobaqaning yarim finaliga chiqqan ilk jamoaga aylandi.
AQSHning Massachusets shtatidagi Gillette Stadiumda bo‘lib o‘tgan uchrashuvning birinchi bo‘limida hisob ochilmadi. Fransiya sardori Kilian Mbappe 28-daqiqada penalti tepish imkoniyatidan foydalana olmadi. Shunga qaramay, ikkinchi bo‘limda fransuzlar tashabbusni to‘liq o‘z qo‘liga oldi.
Hisob 60-daqiqada Kilian Mbappe tomonidan ochildi. Oradan olti daqiqa o‘tib esa Usmon Dembele Mbappening uzatmasidan unumli foydalanib, jamoasining ikkinchi golini kiritdi va uchrashuv taqdirini hal qildi.
Mazkur g‘alaba evaziga Fransiya Jahon chempionati tarixida sakkizinchi marta yarim finalga chiqib, Braziliyaning rekordini takrorladi. Shuningdek, fransuzlar ketma-ket uchinchi bor mundial yarim finalida ishtirok etadigan bo‘ldi.
Yarim finalda Didye Desham shogirdlari Ispaniya – Belgiya uchrashuvi g‘olibiga qarshi maydonga tushadi. Ushbu bahs 14-iyul kuni Dallasda bo‘lib o‘tadi.
