O‘zbekistonlik oilalar uchun barcha sharoitlarni yaratamiz — Aleksandr Lukashenko
Belarus prezidenti O‘zbekiston fuqarolarini, xususan oilalarni Belarusga kelib, yashash va ishlashga taklif qildi.
Minsk shahrida Shavkat Mirziyoyev bilan o‘tkazilgan muzokaralar yakunida Belarus rahbari mamlakatda ishchi kuchiga ehtiyoj mavjudligini ta’kidlab, o‘zbekistonlik oilalarni Belarusda istiqomat qilishga chaqirdi.
Lukashenkoning so‘zlariga ko‘ra, Belarusda yer va suv resurslari yetarli bo‘lsa-da, ayrim sohalarda ishchi kuchi tanqisligi kuzatilmoqda. Shu bois u o‘zbekistonlik oilalar Belarusga kelib, yashashi, mehnat qilishi, zarurat tug‘ilganda tibbiy xizmat va ta’lim olish imkoniyatidan foydalanishini istashini bildirgan.
Belarus prezidenti, shuningdek, ikki davlat xalqlari o‘rtasidagi do‘stona munosabatlarni alohida qayd etib, mavjud yaqinlikni amaliy hamkorlik bilan mustahkamlash zarurligini ta’kidlagan.
Muzokaralar davomida iqtisodiy hamkorlik masalalari ham muhokama qilindi. Xususan, Belarus tomoni O‘zbekistonda qishloq xo‘jaligi texnikalarini ishlab chiqarish bo‘yicha hamkorlikni kengaytirish, zarurat tug‘ilganda o‘zbekistonlik mutaxassislarni Belarusdagi korxonalarda o‘qitishga tayyorligini ma’lum qilgan.
Bundan tashqari, Belarus O‘zbekiston investorlarini mamlakatning Vitebsk viloyatida chorvachilik loyihalarini amalga oshirishga taklif etgan. Lukashenko bunday hamkorlik O‘zbekistonni sifatli go‘sht va sut mahsulotlari bilan ta’minlash, Belarus uchun esa yangi ish o‘rinlari yaratish va qishloq hududlarini rivojlantirishga xizmat qilishini qayd etgan.
Shuningdek, u Belarus hududlarida O‘zbekiston savdo uylari tarmog‘ini kengaytirish tashabbusini ilgari surgan.
Muzokaralar yakunida O‘zbekiston va Belarus prezidentlari ikki davlat o‘rtasida strategik sheriklik munosabatlarini o‘rnatish to‘g‘risidagi deklaratsiyani imzoladilar.
