Sobiq maktab direktori Gulira’no Qosimova sud qarori bilan lavozimiga tiklandi
Fuqarolik ishlari bo‘yicha Farg‘ona tumanlararo sudi ish beruvchining xodimni ishdan bo‘shatish haqidagi buyrug‘ini g‘ayriqonuniy deb topdi.
Sobiq maktab direktori Gulira’no Qosimova fuqarolik ishlari bo‘yicha Farg‘ona tumanlararo sudining hal qiluv qarori bilan avvalgi ish joyiga tiklandi. Sud, shuningdek, uning majburiy progul davri uchun uch oylik ish haqi undirilishi haqida ham qaror chiqardi.
Qosimovaning aytishicha, u ishdan noqonuniy bo‘shatilgani yuzasidan sudga da’vo arizasi bilan murojaat qilgan. Sud ish materiallarini o‘rganib, ish beruvchining uni ishdan bo‘shatish haqidagi buyrug‘ini g‘ayriqonuniy deb topgan hamda da’vogarning talablarini qanoatlantirgan.
Gulira’no Qosimova sud qarori bilan buzilgan mehnat huquqlari tiklanganini bildirib, sud tizimiga minnatdorlik izhor etdi. Uning ta’kidlashicha, mazkur jarayon sudlarga bo‘lgan ishonchini yanada mustahkamlagan.
"Sud mening huquqlarimni tikladi va adolat qaror topdi. Sudyalar ishni xolis va qonun asosida ko‘rib chiqdi", dedi u.
Qosimova, shuningdek, sud hokimiyati faoliyati hamda fuqarolarning huquqlarini himoya qilish borasidagi islohotlarni e’tirof etib, sudyalarga, davlat rahbariga minnatdorlik bildirdi.
Furqat tumanidagi maktab direktori IIB va Soliq boshliqlari munosabati qurboni bo‘lgan edi.
