Uyida 20 kgdan ortiq narkotik saqlagan 58 yoshli shaxs ushlandi
Shuningdek, Toshkentda virtual narkokanal tashkil qilgan ikki nafar shaxs ham qo‘lga olingan.
DXX ma’lumotiga ko‘ra, “Xavfsiz va sog‘lom yurt” tezkor tadbir davomida 1968-yilda Surxondaryo viloyatida tug‘ilgan fuqaroning Toshkent shahridagi vaqtincha yashash xonadoni xolislar ishtirokida ko‘zdan kechirilgan.
Natijada xonadondan 13 kilogramm 50 gramm opiy hamda 7 kilogramm 137 gramm gashish aniqlanib, ashyoviy dalil sifatida rasmiylashtirib olingan. Shu tariqa jami 20 kilogrammdan ortiq giyohvandlik vositasi musodara qilingan.
Mazkur holat yuzasidan DXX Tergov boshqarmasi tomonidan fuqaro ustidan Jinoyat kodeksining 246 va 273-moddalari bilan jinoyat ishi qo‘zg‘atilgan.
Hozirda tergov doirasida uning ehtimoliy jinoiy sheriklari hamda narkotik moddalarning kelib chiqish manbalarini aniqlash bo‘yicha tezkor-tergov harakatlari davom ettirilmoqda.
Bundan tashqari, DXXning Toshkent shahar bo‘yicha boshqarmasi hamda poytaxt IIBB xodimlari hamkorligida o‘tkazilgan yana bir tezkor tadbirda virtual narkokanal tashkil qilgan 1991 va 2000-yillarda tug‘ilgan ikki nafar fuqaro qo‘lga olingan.
Ulardan gashish va gashish moyi musodara qilingan.
Ma’lum qilinishicha, qo‘lga olinganlardan biri ilgari Jinoyat kodeksining bir necha moddalari bilan sudlangan, ikkinchisi esa joriy yilning aprel oyida giyohvandlik vositalari bilan ushlanib, tergovga gumondor sifatida jalb etilgan bo‘lgan.
Hozirda har ikkala holat yuzasidan tergov harakatlari davom etmoqda.
