JCH-2026: Messi boshchiligidagi Argentina Shveysariyani magʻlub etib yarim finalga yoʻl oldi
Amaldagi jahon chempionlari final yoʻllanmasi uchun Angliya bilan bahs olib boradi.
Jahon chempionatining chorak final bosqichidan o‘rin olgan Argentina va Shveysariya terma jamoalari o‘rtasidagi bahs yakunlandi. Qo‘shimcha bo‘limlargacha davom etgan uchrashuvda amaldagi jahon chempionlari 3:1 hisobida g‘alaba qozonib, yarim finalning so‘nggi yo‘llanmasini qo‘lga kiritdi.
Argentina uchrashuvni faol boshladi va 10-daqiqada Aleksis Mak Allisterning aniq zarbasi evaziga hisobni ochdi. Ikkinchi bo‘limda Shveytsariya hujumlarini kuchaytirdi va 67-daqiqada Dan Ndoye muvozanatni tikladi. Asosiy vaqtda boshqa gol urilmadi va bahs qo‘shimcha bo‘limlarga yo‘l oldi.
Ekstra taymlarning ikkinchi qismida Xulian Alvares uzoq masofadan yo‘llagan chiroyli zarbasi bilan argentinaliklarni yana oldinga olib chiqdi. Uchrashuvning so‘nggi soniyalarida esa Lautaro Martines qarshi hujumni gol bilan yakunlab, yakuniy hisobni 3:1 ko‘rinishiga keltirdi.
Shveytsariya uchrashuvning 72-daqiqasidan boshlab bir kishi kam bo‘lib harakat qildi. Breel Embolo ikkinchi sariq kartochkasini olib, maydonni tark etdi.
Shu tariqa, Lionel Messi boshchiligidagi Argentina yarim final yo‘llanmasini qo‘lga kiritdi. Endi amaldagi jahon chempionlari final yo‘llanmasi uchun Angliya terma jamoasiga qarshi maydonga tushadi.
JCH-2026. Chorak final
Argentina — Shveytsariya 3:1 (qo‘shimcha bo‘limlardan so‘ng)
Gollar: Mak Allister 10, Alvares 112, Lautaro Martines 120+1 — Ndoye 67.
