Kannavaroning O‘zbekiston MTJdagi kelajagi ma’lum bo‘ldi
JChdagi qoniqarsiz natijalar sabab italiyalik murabbiyning terma jamoadan ketishi haqida mish-mishlar paydo bo‘lgandi.
O‘zbekiston milliy terma jamoasi bosh murabbiyi Fabio Kannavaro o‘z lavozimida qoladi va jamoani 2027 yilgi Osiyo kubogiga tayyorlaydi. Bu haqda Championat.asia nashri xabar berdi.
Manba ma’lumotiga ko‘ra, O‘zbekiston futbol assotsiatsiyasi rahbariyati italiyalik mutaxassis faoliyatiga ishonch bildirmoqda. Shu sababli Kannavaro terma jamoa bilan ishlashni davom ettiradi hamda jamoani navbatdagi yirik musobaqa — Saudiya Arabistonida bo‘lib o‘tadigan Osiyo kubogiga boshlab boradi.
Qayd etilishicha, JCH-2026 yakunlanganidan so‘ng murabbiy oldiga Osiyo kubogida yuqori natija qayd etish, xususan, chempionlik uchun kurashish vazifasi qo‘yilgan.
Shuningdek, yaqin kunlarda Fabio Kannavaro terma jamoaning navbatdagi o‘quv-mashg‘ulot yig‘inlari rejasini ishlab chiqishi va Osiyo kubogiga tayyorgarlikning yangi bosqichini boshlashi kutilmoqda.
Murabbiylar shtabi tarkibni yanada shakllantirish hamda qit’a birinchiligiga puxta tayyorgarlik ko‘rishga asosiy e’tiborni qaratadi.
