O‘zbekistonda bug‘doydan bo‘shagan dalalarni yoqqan 172 kishi jarimaga tortildi
Huquqbuzarlarga jami 212,5 million so‘m miqdorida ma’muriy jarima qo‘llanilgan. Tabiatga yetkazilgan zarar 652,3 million so‘m etib baholangan.
O‘zbekistonda bug‘doydan bo‘shagan yer maydonlarini yoqish holatlariga qarshi nazorat kuchaytirildi, deya xabar bermoqda Ekologiya va iqlim o‘zgarishi milliy qo‘mitasi.
Ma’lum qilinishicha, qonunbuzarliklar aerokosmik ma’lumotlar yordamida aniqlanmoqda. Dalalarni yoqishning oldini olish maqsadida hududlardagi 7 760 ta fermer xo‘jaligiga ogohlantirish xatlari yuborilgan.
Shuningdek, Ekopolitsiya va “O‘zbekkosmos” agentligi tomonidan olib borilgan monitoring davomida bug‘doydan bo‘shagan 744 ta yer maydonida yong‘in holati aniqlangan. Davlat ekologiya inspektorlari tomonidan o‘tkazilgan tekshiruvlar yakunida 172 nafar huquqbuzarga 212,5 million so‘m miqdorida ma’muriy jarima qo‘llanilgan. Bundan tashqari, tabiatga yetkazilgan zarar 652,3 million so‘m etib baholangan.
Qo‘mita ma’lumotiga ko‘ra, joriy yil boshidan buyon dala va aholi punktlarida ang‘iz, xazon, shox-shabba hamda boshqa o‘simlik qoldiqlari, shuningdek, qurilish chiqindilarini yoqish bilan bog‘liq 9 821 ta huquqbuzarlik aniqlanib, ular bo‘yicha belgilangan tartibda ma’muriy bayonnomalar rasmiylashtirilgan.
Ekologiya va iqlim o‘zgarishi milliy qo‘mitasi fuqarolar hamda fermer xo‘jaliklarini g‘alladan bo‘shagan maydonlarda somonpoyalarni yoqmaslikka va bunday holatlarga yo‘l qo‘ymaslikka chaqirdi.
