Toshkentdagi "O‘zbekiston" mehmonxonasida yong‘in sodir bo‘ldi
Mehmonxonaning 10-qavatidagi ishchilar xonasi yonib zararlangan. Hodisa oqibatida jabrlanganlar yo‘q.
Favqulodda vaziyatlar vazirligi ma’lumotiga ko‘ra, 12-iyul kuni soat 14:45 da Mirzo Ulug‘bek tumani Mustaqillik shoh ko‘chasida joylashgan "O‘zbekiston" mehmonxonasining 10-qavatida yong‘in sodir bo‘layotgani haqida Toshkent shahar Favqulodda vaziyatlar bosh boshqarmasiga xabar kelib tushgan.
Qutqaruv ekipajlari voqea joyiga soat 14:49 da yetib borib, yong‘inni soat 14:54 da to‘liq o‘chirgan.
Dastlabki ma’lumotlarga ko‘ra, mehmonxonaning 10-qavatidagi ishchi-xizmatchilar xonasi yonib zararlangan. Binoda o‘rnatilgan yong‘inga qarshi xavfsizlik tizimlari o‘z vaqtida ishga tushgani sababli yong‘in qisqa fursatda bartaraf etilgan.
Hodisa oqibatida tan jarohati olganlar yo‘q.
