Iroqda korrupsiyaga qarshi kampaniya doirasida 375 kilogramm oltin musodara qilindi

Iroq huquqni muhofaza qiluvchi organlari korrupsiyaga qarshi keng ko‘lamli kampaniya doirasida 375 kilogramm oltinni musodara qildi. Bu haqda Al Jazeera xabar berdi.

 

Ma’lum qilinishicha, qimmatbaho metall korrupsiyada gumonlanayotgan neftni qayta ishlash masalalari bo‘yicha sobiq neft vaziri o‘rinbosari Adnan al-Jumayliyga oid jinoyat ishi doirasida aniqlangan.

 

Iroq Oliy sud kengashi ma’lumotiga ko‘ra, Kurdiston mintaqaviy hukumati bilan hamkorlikda o‘tkazilgan operatsiya davomida 358 kilogramm oltin, alohida tergov doirasida esa yana 17 kilogramm oltin musodara qilingan. Oltin Iroq Markaziy bankiga topshirilgan.

 

Tergov ma’lumotlariga ko‘ra, Adnan al-Jumayliy davlat resurslari va hukumat shartnomalaridan noqonuniy foydalanib, pora va shaxsiy manfaat evaziga korrupsion sxemalarni yo‘lga qo‘yganlikda gumon qilinmoqda. U may oyida hibsga olingan, 2-iyun kuni esa rasman lavozimidan chetlatilgan.

 

Mazkur ish doirasida avvalroq yomg‘ir suvi oqizish quvuridagi chuqurdan 14 milliard Iroq dinori (10,6 million dollar) naqd pul topilgani ham ma’lum qilingan edi. Hukumat hisob-kitobiga ko‘ra, faqat ushbu ishning o‘zida aniqlangan mablag‘lar 127 milliard Iroq dinori (96 million dollar) hamda qo‘shimcha 24 million dollar, ko‘chmas mulklar, avtomobillar va oltin taqinchoqlarni tashkil etadi.

 

Rasmiylarga ko‘ra, tergovlar davlat mablag‘larining talon-toroj qilinishini fosh etishga qaratilgan “Tong operatsiyasi” (Operation Dawn) doirasida olib borilmoqda. Kampaniya davomida bir necha yuqori lavozimli mansabdorlar, jumladan, deputatlar ham hibsga olingan, ayrimlarining daxlsizligi bekor qilingan.

 

Iroq hukumati xorijda yashayotgan yuzlab gumondorlarni ekstraditsiya qilish va chetga olib chiqilgan aktivlarni qaytarish choralarini ham ko‘rmoqda.