Qirg‘iziston Prezidentining qizi ommaga ko‘rinish berdi
Sadir Japarov bu piar yoki siyosatga aralashishga urinish emasligini aytdi.
Qirg‘iziston prezidenti Sadir Japarov ijtimoiy tarmoqlarda qizi Janayimning “Oltin Bolalik” reabilitatsiya markazida bolalarga sovg‘alar ulashayotgani aks etgan video yuzasidan izoh berdi. Bu haqda 24.kg xabar berdi.
Prezidentning aytishicha, bu holat na piar, na qizini siyosatga jalb etishga urinish bilan bog‘liq. Japarov bu haqda “Kabar” axborot agentligiga bergan intervyusida so‘z ochib, farzandlari va yaqinlarini siyosat hamda davlat ishlariga aralashtirmasligini ta’kidladi. Uning so‘zlariga ko‘ra, agar bunday urinishlar bo‘lganida, bu allaqachon jamoatchilikka ma’lum bo‘lardi.
Prezidentning ma’lum qilishicha, “Oltin Bolalik” bolalar reabilitatsiya markazi uning topshirig‘i bilan uch yil avval to‘liq qurib bitkazilgan va zarur jihozlar bilan ta’minlangan. Hozir u yerda har yili Qirg‘izistonning barcha hududlaridan, avvalo kam ta’minlangan oilalar farzandlari sog‘lomlashtiriladi.
Japarov uning rafiqasi Aygul Japarova har yili markazdagi bolalarga sovg‘alar topshirishini aytdi. Bu yil u markazga bora olmagani sababli sovg‘alarni qizi Janayim olib borgan. U bolalarga kiyimlarni topshirgach, darhol ortga qaytgan.
Prezidentning ta’kidlashicha, tadbirni ommaviy yoritish rejalashtirilmagan, unda OAV vakillari ham ishtirok etmagan. Videoni tadbir ishtirokchilaridan biri telefonida tasvirga olib, keyinchalik ijtimoiy tarmoqlarga joylashtirgan.
Japarov ushbu voqeadan siyosiy maqsadlarda foydalanmaslikka chaqirdi.
