Samarqandda prokurorga nisbatan jinoyat ishi qo‘zg‘atildi
Mansabdor gazdan noqonuniy foydalanish bo‘yicha zarar miqdorini kamaytirish evaziga pora olgan.
Samarqand viloyatida Urgut tumani prokurori o‘rinbosariga nisbatan pora olish va mansab vakolatlarini suiiste’mol qilish holatlari yuzasidan jinoyat ishi qo‘zg‘atildi. Bu haqda Davlat xavfsizlik xizmati ma’lum qildi.
Aniqlanishicha, u Pastdarg‘om tumani prokuraturasida faoliyat yuritgan davrida xizmat mavqeidan foydalanib, mahalliy MCHJ tomonidan tabiiy gazdan noqonuniy foydalanilishi oqibatida davlatga yetkazilgan 2 milliard 887 million so‘mlik zararni 805,9 million so‘mga kamaytirib berish evaziga vositachilar orqali 6,5 ming AQSH dollari va 35 million so‘m pora olgan.
Shuningdek, mansabdor shaxs mazkur MCHJ mansabdorlariga nisbatan Jinoyat kodeksining 169-moddasi bilan qo‘zg‘atilgan jinoyat ishi doirasida zarar miqdorini 150–200 million so‘mgacha kamaytirish hamda sudda yengilroq jazo tayinlanishiga ko‘maklashishni va’da qilib, korxona egasidan 15 ming AQSH dollari talab qilgani aniqlangan.
Prokuror o‘rinbosarining noqonuniy harakatlari yuzasidan ashyoviy dalillar protsessual tartibda rasmiylashtirilgan.
Mazkur holat yuzasidan unga nisbatan jinoyat ishi qo‘zg‘atilib, qamoq ehtiyot chorasi qo‘llanilgan. Hozirda dastlabki tergov harakatlari davom ettirilmoqda.
