Surxondaryoda bolalarga noqonuniy diniy ta’lim bergan shaxslar ushlandi
Bolalarning ota-onalariga nisbatan amaldagi qonunchilik asosida tegishli choralar ko‘rilmoqda.
Surxondaryo viloyatida ichki ishlar organlari va Davlat xavfsizlik xizmati xodimlari tomonidan o‘tkazilgan tezkor tadbir davomida voyaga yetmaganlarga noqonuniy diniy ta’lim berish holati fosh etildi. Bu haqda IIV xabar berdi.
Ma’lum qilinishicha, Termiz shahrida 1971 va 1996-yillarda tug‘ilgan ikki nafar fuqaro o‘z yashash xonadonida besh nafar voyaga yetmagan bolaga moddiy manfaat evaziga, tegishli ruxsatlarsiz hamda amaldagi qonunchilik talablariga zid ravishda diniy ta’lim berib kelgan.
Tezkor tadbir davomida xonadondan 14 dona diniy adabiyot protsessual tartibda hujjatlashtirib olingan.
Mazkur holat yuzasidan gumonlanuvchilarga nisbatan Jinoyat kodeksining 229²-moddasi asosida jinoyat ishi qo‘zg‘atilib, tergov harakatlari olib borilmoqda.
Shuningdek, noqonuniy diniy ta’lim olgan voyaga yetmaganlarning ota-onalariga nisbatan ham amaldagi qonunchilikka muvofiq tegishli choralar ko‘rilayotgani bildirildi.
