Jazirama sabab Surxondaryoda yuk mashinalari harakati cheklanadi

 

Surxondaryo viloyatida o‘ta issiq ob-havo sabab og‘ir yuk avtomobillari harakatiga vaqtinchalik cheklov joriy etiladi.

 

Viloyat hokimligi ma’lum qilishicha, jazirama havo sharoitida avtomobil yo‘llari qoplamasini saqlash hamda ularning muddatidan oldin shikastlanishining oldini olish maqsadida og‘ir yuk transporti harakati vaqtincha cheklanadi.

 

Gidrometeorologiya xizmati ma’lumotlariga ko‘ra, viloyatda kunduzi havo harorati 42–44°C, ayrim hududlarda esa undan ham yuqori darajaga ko‘tarilmoqda. Bunday sharoitda asfalt qoplamasi harorati 70–80°C gacha yetishi natijasida yo‘llarning yuk ko‘tarish qobiliyati pasayib, og‘ir transport vositalari ta’sirida deformatsiyalar yuzaga kelishi mumkin.

 

Shu munosabat bilan Termiz shahri, tuman markazlari hamda ularni bog‘lovchi umumiy foydalanishdagi avtomobil yo‘llarida og‘ir yuk avtomobillarining harakati har kuni soat 10:00 dan 19:00 gacha vaqtincha cheklanadi.

 

Viloyat hokimligi haydovchilar hamda yuk tashuvchi korxona va tashkilotlardan belgilangan cheklovlarga qat’iy amal qilish, yuk tashish vaqtlarini oldindan rejalashtirishni so‘radi.

 

Qayd etilishicha, mazkur choralar yo‘l infratuzilmasini asrash, harakat xavfsizligini ta’minlash hamda avtomobil yo‘llarining xizmat muddatini uzaytirishga xizmat qiladi.