O‘zbekiston TIVda “Dolzarb viza” oyligi boshlandi
Oylik doirasida o‘zbekistonliklar uchun vizasiz mamlakatlar sonini oshirish va viza olish tartibini soddalashtirish bo‘yicha xorijiy davlatlar bilan muzokaralar faollashtiriladi.
O‘zbekiston Respublikasi Prezidentining “O‘zbekiston–2030” strategiyasida belgilangan vazifalar ijrosini ta’minlash maqsadida Tashqi ishlar vazirligi tizimida “Dolzarb viza” oyligi boshlandi.
Vazirlik ma’lum qilishicha, oylik davomida O‘zbekistonning xorijdagi diplomatik vakolatxonalari va konsullik muassasalari xorijiy hamkorlar bilan muzokaralarni jadallashtiradi.
Bunda asosiy e’tibor O‘zbekiston fuqarolari uchun vizasiz safar qilish imkoniyatlarini kengaytirish, viza rasmiylashtirish tartib-taomillarini soddalashtirish hamda zamonaviy va qulay viza mexanizmlarini joriy etishga qaratiladi.
Shuningdek, muzokaralarda vizasiz rejimni yo‘lga qo‘yish, elektron vizalarni joriy etish, soddalashtirilgan viza tartiblarini kengaytirish va boshqa yengillashtirilgan mexanizmlarni tatbiq etish masalalari ustuvor yo‘nalish sifatida ko‘rib chiqiladi.
Qayd etilishicha, mazkur tashabbus O‘zbekiston fuqarolarining xalqaro harakatlanish imkoniyatlarini kengaytirish, xorijga safar qilish uchun yanada qulay shart-sharoitlar yaratish hamda mamlakatning ochiq va faol tashqi siyosatini izchil amalga oshirishga xizmat qiladi.
