Toshkent va Qashqadaryoda pora olgan mansabdorlar qo‘lga olindi
15 ming dollar va 17 mln so‘m pora bilan bog‘liq korrupsion holatlar yuzasidan jinoyat ishlari qo‘zg‘atildi.
Davlat xavfsizlik xizmati hamda huquqni muhofaza qiluvchi organlar tomonidan o‘tkazilgan tezkor tadbirlar davomida Toshkent shahri va Qashqadaryo viloyatida ikki korrupsion holat fosh etildi. Bu haqda DXX ma'lum qildi.
Toshkent shahrida Davlat mulki obyektlaridan samarali foydalanish markazi hududiy boshqarmasining bosh mutaxassisi mansabdor tanishlari orqali sanoat zonasi balansidagi yer maydonini ijaraga rasmiylashtirish, ijara haqini kamaytirish hamda korxonaning avvalgi qarzdorligini bartaraf etish evaziga 15 ming AQSH dollari talab qilgan. U so‘ralgan mablag‘ni olgan vaqtida ashyoviy dalillar bilan ushlangan.
Qashqadaryo viloyatida esa Muborak tumani Elektr ta’minoti korxonasi boshlig‘i o‘rinbosari elektr tarmog‘iga noqonuniy ulanish bilan bog‘liq ish bo‘yicha korxonaga yetkazilgan 103 million so‘mlik zararni 34 million so‘mga kamaytirib berganini aytib, buning evaziga 17 million so‘m talab qilgan. Mansabdorning noqonuniy harakati pul mablag‘larini turmush o‘rtog‘i orqali olayotgan vaqtida qo'lga olingan.
Har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
