Rossiya va Ukraina 532 nafar halok bo‘lgan harbiyning jasadini almashdi
Ukraina 501 nafar, Rossiya esa 31 nafar harbiyning jasadini qabul qilgan.
Rossiya va Ukraina urushda halok bo‘lgan 532 nafar harbiyning jasadini almashdi. Bu haqda The Moscow Times xabar berdi.
Davlat dumasi deputati Shamsail Saraliyevga ko‘ra, Ukraina 501 nafar harbiy xizmatchining jasadini qabul qilgan, evaziga esa Rossiyaga 31 nafar harbiyning jasadi topshirilgan.
Interfaks agentligi ma’lumotiga ko‘ra, almashinuv Belarus bilan chegaraga yaqin hududda amalga oshirilgan. Ukraina tomoni mazkur almashinuvni hozircha rasman tasdiqlamagan.
RBC qayd etishicha, bu 2026-yil boshidan buyon halok bo‘lgan harbiylar jasadlari yoki harbiy asirlar almashilgan 13-holat hisoblanadi.
Halok bo‘lgan harbiylarning jasadlarini qaytarish va harbiy asirlarni almashish 2022-yilda Rossiyaning Ukrainaga keng ko‘lamli bosqini boshlanganidan buyon ikki davlat o‘rtasidagi kam sonli gumanitar hamkorlik yo‘nalishlaridan biri bo‘lib qolmoqda.
Qayd etilishicha, Rossiya harbiylari Ukraina tomonini 6-iyul kuni halok bo‘lgan harbiylarning jasadlarini almashish uchun e’lon qilingan olti soatlik o‘t ochishni to‘xtatish rejimini rad etganlikda ayblagan. Ukrainadan bu da’voga rasmiy munosabat bildirilmagan.
