Toshkent aeroportida ikki ayol odam savdosi qurboni bo‘lishdan saqlab qolindi
Ular Turkiyada yuqori daromadli ish topish va’dasiga aldanib, Istanbulga yo‘l olgandi.
Farg‘ona viloyati Ichki ishlar boshqarmasi hamda Davlat xavfsizlik xizmati xodimlari hamkorligida odam savdosi bilan bog‘liq jinoyatning oldi olindi.
Aniqlanishicha, Namangan viloyatining Pop tumanida ro‘yxatda turgan, ammo Farg‘ona viloyatining Buvayda tumanida yashab kelgan ayol Turkiyaning Istanbul shahrida istiqomat qiluvchi tanishi bilan oldindan til biriktirib, ikki nafar ayolni chet elga yuborishga uringan.
Ma’lum qilinishicha, jabrlanuvchilardan biri Uchko‘prik, ikkinchisi esa Buvayda tumanida yashaydi. Gumonlanuvchilar ularni Turkiyada yuqori daromadli ish topish va’dasi bilan aldab, Istanbulga borish uchun elektron aviachiptalarni ham rasmiylashtirib bergan.
Biroq huquqni muhofaza qiluvchi organlar tomonidan o‘tkazilgan tezkor tadbir davomida ayollarning xorijga chiqib ketishiga Toshkent xalqaro aeroportida chek qo‘yildi.
Mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
Huquqni muhofaza qiluvchi organlar fuqarolarni xorijda ish taklif qilayotgan shaxslarga ishonishda ehtiyot bo‘lish, faqat qonuniy mehnat migratsiyasi yo‘llaridan foydalanish va shubhali takliflarga aldanmaslikka chaqirdi.
