Rossiyada og‘ir ahvolga tushgan o‘zbekistonlik ayol uch farzandi bilan vatanga qaytarildi
Ayol 15 yildan ortiq vaqt davomida Rossiyada qonuniy maqomsiz yashab kelgan
O‘zbekistonning Rossiyadagi elchixonasi ko‘magida og‘ir hayotiy vaziyatga tushib qolgan O‘zbekiston fuqarosi A.S. uch nafar voyaga yetmagan farzandi bilan vatanga qaytarildi. Bu haqda “Dunyo” axborot agentligi xabar berdi.
Ma’lum qilinishicha, ayol elchixonaning konsullik bo‘limiga murojaat qilib, 15 yildan ortiq vaqt davomida Rossiyada qonuniy maqomsiz yashab kelgani, shaxsini tasdiqlovchi hujjatlar va moliyaviy imkoniyatlari yo‘qligi sababli farzandlari uchun munosib sharoit yarata olmayotganini ma’lum qilgan hamda O‘zbekistonga qaytishda yordam so‘ragan.
Konsullik bo‘limi xodimlari Rossiyaning tegishli davlat idoralari bilan hamkorlikda ayolning uch nafar farzandiga tug‘ilganlik haqidagi guvohnomalarni rasmiylashtirgan. Shuningdek, ularga konsullik yig‘imlari undirilmagan holda O‘zbekistonga qaytish guvohnomalari berilgan.
Bundan tashqari, O‘zbekiston Migratsiya agentligining Rossiyadagi vakolatxonasi ko‘magida ayol va uning farzandlari uchun Uzbekistan Airways aviakompaniyasining Moskva–Urganch yo‘nalishi bo‘yicha aviachiptalar xarid qilinib, ularning O‘zbekistonga xavfsiz qaytishi ta’minlangan.
