Zangiotadagi gaz “zapravka”sida yuz bergan portlash sabablari ochiqlandi
AGTShda maishiy gaz ballonlariga noqonuniy gaz to‘ldirilgani portlashga sabab bo‘lgan.
Toshkent viloyatining Zangiota tumanida avtomobillarga suyultirilgan gaz to‘ldirish shoxobchasida (AGTSh) yuz bergan portlash bo‘yicha dastlabki o‘rganish natijalari e’lon qilindi.
Sanoat, radiatsiya va yadro xavfsizligi qo‘mitasi ma’lumotiga ko‘ra, hodisa 16-iyul kuni soat 22:46 atrofida Zangiota tumani Erkin mahallasida joylashgan “Ohangaron gaz to‘ldirish shoxobchasi” MChJ hududida sodir bo‘lgan.
Dastlabki o‘rganishlar shuni ko‘rsatdiki, mazkur shoxobchaga faqat avtomobillarga suyultirilgan gaz to‘ldirish uchun ruxsat berilgan bo‘lishiga qaramay, u yerda belgilangan talablarga zid ravishda maishiy gaz ballonlariga ham gaz quyilgan.
Hodisa vaqtida “Labo” rusumli avtomobilda olib kelingan 6 dona maishiy gaz balloniga qo‘lbola o‘tish moslamasi orqali gaz to‘ldirilayotgan bo‘lgan. Uchinchi ballon to‘ldirilayotgan paytda bosim ostidagi shlang yorilib, ulangan joyidan ajralgan. Natijada yuzaga kelgan chaqnash gaz ballonlarining ketma-ket portlashiga sabab bo‘lgan.
Portlash oqibatida 2 ta gaz balloni portlagan, yana 4 tasi yonib, mexanik shikastlangan.
Hodisada uch nafar fuqaro turli darajadagi kuyish jarohatini olgan. Ulardan ikki nafarining ahvoli o‘rta og‘ir (12–15 foiz), bir nafarining ahvoli esa og‘ir (80 foiz) ekani ma’lum qilindi. Jabrlanganlarga zarur tibbiy yordam ko‘rsatilmoqda.
Ayni paytda voqea joyida Sanoat, radiatsiya va yadro xavfsizligi qo‘mitasi mutaxassislari hamda huquqni muhofaza qiluvchi organlar vakillari ishtirokida o‘rganish ishlari davom etmoqda.
Mazkur holat yuzasidan Jinoyat kodeksining tegishli moddalari asosida jinoyat ishi qo‘zg‘atilgan. Portlashning aniq sabablarini aniqlash maqsadida kompleks sud ekspertizasi tayinlangan.
