Anomal issiq avtobuslardagi konditsionerlar samaradorligiga ta’sir qilmoqda — "Toshshahartransxizmat"

"Toshshahartransxizmat" AJ so‘nggi kunlarda avtobuslardagi konditsionerlar faoliyati yuzasidan ijtimoiy tarmoqlarda tarqalayotgan tanqidiy murojaatlarga izoh berdi.

 

Ma’lum qilinishicha, bugungi kunda korxona avtobus saroylari filiallari tasarrufida har kuni 1672 ta avtobus va elektrobus yo‘nalishlarga chiqarilmoqda. Yo‘lovchilarga Mercedes-Benz, SAZ LE-60, MAN, Yutong hamda King Long rusumidagi transport vositalari xizmat ko‘rsatmoqda.

 

Harakat tarkibidagi 102 ta Mercedes-Benz avtobusining barchasi, 272 ta MAN avtobusining 100 tasi hamda 201 ta SAZ LE-60 avtobusining 88 tasi ishlab chiqaruvchi zavod tomonidan salonni sovitish tizimi bilan jihozlanmagan.

 

Shuningdek, Toshkent shahrida kuzatilayotgan 45 daraja va undan yuqori anomal issiq, avtobus saloniga quyosh nurlarining to‘g‘ridan-to‘g‘ri tushishi, bekatlarda eshiklarning tez-tez ochilib-yopilishi va yo‘lovchilar sonining ko‘pligi Yutong hamda King Long rusumidagi avtobus va elektrobuslardagi konditsioner tizimlariga qo‘shimcha yuklama berayotgani qayd etildi.

 

Qayd etilishicha, bunday ekstremal ob-havo sharoitida texnik jihatdan soz konditsionerlar ham nominal sovitish quvvatini to‘liq ta’minlay olmasligi mumkin. Shu bois yozning anomal issiq kunlarida sovitish samaradorligining pasayishi ko‘p hollarda uskunaning nosozligi emas, balki yuqori harorat sharoitida ishlash va issiqlik almashinuvi samaradorligining pasayishi bilan bog‘liq tabiiy texnik holat ekani ta’kidlandi.

 

"Toshshahartransxizmat" AJ yo‘lovchilar uchun qulay sharoit yaratish bo‘yicha barcha imkoniyatlar ishga solinayotganini bildirib, ob-havo bilan bog‘liq ushbu vaqtinchalik noqulaylikni tushunishlarini so‘radi.