Ispaniya 2026-yilgi FIFA Jahon chempionatida g‘olib bo‘ldi
Terma jamoasi finalda Argentinani 1:0 hisobida mag‘lub etib, tarixida ikkinchi bor FIFA Jahon chempionligini qo‘lga kiritdi.
Ispaniya milliy terma jamoasi AQSh, Kanada va Meksikada o‘tkazilgan 2026-yilgi FIFA Jahon chempionati finalida Argentina ustidan 1:0 hisobida g‘alaba qozonib, tarixida ikkinchi bor jahon chempioniga aylandi.
AQShning Nyu-Jersi shtatidagi MetLife stadionida bo‘lib o‘tgan hal qiluvchi uchrashuvning asosiy vaqtida hisob ochilmadi. Bahs qo‘shimcha bo‘limlargacha davom etdi va 106-daqiqada yarim himoyachi Ferran Torres kiritgan gol Ispaniyaga chempionlikni taqdim etdi.
Argentina esa 90+3-daqiqadan boshlab bir kishi kam bo‘lib harakat qildi. Yarim himoyachi Enso Fernandes ikkinchi sariq kartochka olib maydondan chetlatildi.
Shu tariqa Ispaniya 2010-yildan keyin yana FIFA Jahon chempionligini qo‘lga kiritdi. Argentina esa tarixidagi yettinchi finalda mag‘lubiyatga uchradi. Janubiy amerikaliklar bungacha 1978, 1986 va 2022-yillarda jahon chempioni bo‘lgan edi.
Lionel Messi 39 yoshida Jahon chempionati finalida maydonga tushgan eng yoshi katta maydon futbolchisiga aylandi. Ispaniyaning 19 yoshli hujumchisi Lamin Yamal esa mundial finallarida maydonga tushgan eng yosh futbolchilar qatoridan joy oldi.
