Yangilangan FIFA reytingida O‘zbekiston MTJ 10 pog‘onaga pastladi
O‘zbekistonning so‘nggi yangilanishda ochko yo'qotishiga terma jamoaning 2026 yilgi Jahon chempionatidagi muvaffaqiyatsiz ishtiroki asosiy sabab bo‘ldi.
FIFA terma jamoalarning navbatdagi reytingini e’lon qildi. Yangilangan ro‘yxatda O‘zbekiston milliy terma jamoasi 10 pog‘ona pastlab, 60-o‘rindan joy oldi. Fabio Kannavaro boshqaruvidagi jamoa hisobida ayni paytda 1409,73 reyting ochkosi mavjud.
O‘zbekiston so‘nggi yangilanishda 23,11 ochko yo‘qotgan. Bunga terma jamoaning 2026 yilgi FIFA Jahon chempionatidagi muvaffaqiyatsiz ishtiroki asosiy sabab bo‘ldi. "Oq bo‘rilar" guruh bosqichida Kolumbiyaga 1:3, Portugaliyaga 0:5 va Kongo DRga 1:3 hisoblarida mag‘lub bo‘lib, musobaqani g‘alabasiz yakunladi. Shuningdek, Kanada va Niderlandiyaga qarshi o‘rtoqlik uchrashuvlaridagi mag‘lubiyatlar ham reytingdagi pasayishga ta’sir ko‘rsatdi.
Osiyo jamoalari orasida Yaponiya 17-o‘rin bilan yetakchilikni saqlab qoldi. Keyingi o‘rinlarni Eron (22), Avstraliya (28) va Janubiy Koreya (32) egallagan. O‘zbekiston 60-o‘rin bilan qit’a reytingida yettinchi bo‘lib turibdi. Saudiya Arabistoni (58) va Qatar (59) O‘zbekistondan yuqorida joylashgan bo‘lsa, Iroq (63), BAA (68) hamda Iordaniya (73) undan keyingi o‘rinlarni band etgan.
Jahon chempionatida g‘olib bo‘lgan Ispaniya 30,27 ochko jamg‘arib, 1995,88 ochko bilan FIFA reytingida birinchi o‘ringa ko‘tarildi. Avvalgi peshqadam Argentina ikkinchi, Fransiya uchinchi, Angliya to‘rtinchi va Braziliya beshinchi o‘rinni egalladi.
Yangilangan reytingning kuchli o‘n beshligiga, shuningdek, Marokash, Portugaliya, Belgiya, Niderlandiya, Meksika, Kolumbiya, Germaniya, Xorvatiya, Shveysariya va Italiya ham kirdi.
FIFA ma’lumotiga ko‘ra, Norvegiya 12 pog‘onaga ko‘tarilib, reytingdagi eng katta o‘sishni qayd etdi. Tunis esa 12 pog‘ona pastlab, eng katta pasayishni boshdan kechirdi. Reyting ochkolari bo‘yicha Ispaniya eng katta (+121,17) o‘sishga erishgan bo‘lsa, Panama eng ko‘p (-60,74) ochko yo‘qotgan terma jamoa bo‘ldi.
