Toshkentdagi “Moviy gumbazlar” kafesi dastlabki qiyofasiga qaytariladi
Madaniy meros agentligi birinchi o‘rinbosari “Moviy gumbazlar” kafesi muallifi — taniqli me’mor Vil Muratov bilan birgalikda madaniy meros obyektini ko‘zdan kechirdi.
Toshkentdagi “Moviy gumbazlar” (Golubiye kupola) kafesi ilmiy tadqiqotlar va xalqaro restavratsiya tamoyillari asosida to‘liq restavratsiya qilinib, uning dastlabki me’moriy qiyofasi tiklanadi.
Madaniy meros agentligi ma’lum qilishicha, agentlik direktorining birinchi o‘rinbosari Elmurod Najimov taniqli me’mor, mazkur obyekt muallifi Vil Muratov bilan birgalikda “Moviy gumbazlar”ni ko‘zdan kechirdi.
1968–1970-yillarda bunyod etilgan “Moviy gumbazlar” Toshkentdagi modernizm me’morchiligining noyob namunalaridan biri bo‘lib, 2019-yilda Vazirlar Mahkamasi qarori bilan ko‘chmas moddiy madaniy meros obyektlarining Milliy ro‘yxatiga kiritilgan.
Qayd etilishicha, keyingi yillarda amalga oshirilgan ta’mirlash ishlari davomida obyektning mozaik bezaklari o‘zgartirilgan va bu uning asl me’moriy-badiiy qiyofasiga salbiy ta’sir ko‘rsatgan. Shu sababli Vil Muratov ishtirokida inshootning dastlabki ko‘rinishini ilmiy o‘rganish va qayta tiklash ishlari boshlandi.
Loyihani amalga oshirish uchun xalqaro va mahalliy mutaxassislardan iborat maxsus ishchi guruh tuziladi. Uning tarkibiga modernizm me’morchiligi bo‘yicha ekspertlar, me’morlar, san’atshunoslar va restavratsiya mutaxassislari, jumladan Yekaterina Golovatyuk, Boris Chuxovich hamda Fotima Abdurahmonova jalb etiladi. Mutaxassislar obyektning tarixiy, me’moriy va badiiy qimmatini saqlab qolish, uning dastlabki elementlarini ilmiy asosda qayta tiklash bo‘yicha yechimlar ishlab chiqadi.
Madaniy meros agentligi ushbu loyiha nafaqat alohida tarixiy binoni qayta tiklash, balki O‘zbekistonning XX asr me’moriy merosini asrash, o‘rganish va xalqaro miqyosda targ‘ib etish yo‘lidagi muhim qadam bo‘lishini ta’kidladi.
