Muruntov konida yuk avtosamosvali xizmat avtomobilini bosib ketdi, ikki kishi halok bo‘ldi
Maxsus komissiya YTHning kelib chiqish sabablari va holatlarini o‘rganmoqda.
Navoiy kon-metallurgiya kombinatining (NKMK) Muruntov oltin konida sodir bo‘lgan yo‘l-transport hodisasi oqibatida ikki nafar ishchi-xodim halok bo‘ldi.
NKMK matbuot xizmati ma’lum qilishicha, hodisa 2026-yil 21-iyul kuni soat 05:30 atrofida kon hududida avtosamosval va xizmat avtomobili ishtirokida sodir bo‘lgan.
Yo‘l-transport hodisasi oqibatida xizmat avtomobilida bo‘lgan ikki nafar ishchi-xodim voqea joyida vafot etgan.
Hozirda mazkur holat yuzasidan huquqni muhofaza qiluvchi organlar tomonidan tergovga qadar tekshiruv olib borilmoqda. Shuningdek, vakolatli davlat nazorat organlari tomonidan maxsus tekshiruv tayinlanib, hodisaning kelib chiqish sabablari va sodir bo‘lish holatlari o‘rganilmoqda.
NKMK axborotiga ko‘ra, bunday noxush hodisalarning oldini olish maqsadida korxonada qo‘shimcha xavfsizlik choralari kuchaytirilmoqda.
