Turizm qo‘mitasi “Xavfsiz turizm” jamg‘armasi bo‘yicha tushuntirish berdi
Qo‘mita loyiha xorijga sayohat qilayotgan fuqarolar xavfsizligini ta’minlash va favqulodda vaziyatlarda ularga yordam ko‘rsatish tizimini takomillashtirishni nazarda tutishini ma’lum qildi.
Turizm qo‘mitasi ijtimoiy tarmoqlarda chiqish turizmi va sohadagi yangi tartib-qoidalar haqida bir tomonlama hamda yetarlicha o‘rganilmagan xabarlar tarqalayotgani munosabati bilan rasmiy bayonot bilan chiqdi.
Qo‘mita ma’lumotiga ko‘ra, so‘nggi yillarda aholi farovonligining oshishi natijasida xorijga sayohat qilayotgan fuqarolar soni sezilarli ko‘paygan. Xususan, 2025-yilda 8 milliondan ortiq o‘zbekistonlik xorijga sayohat qilgan. Shu sababli chet elda bo‘lib turgan fuqarolarni favqulodda vaziyatlarda evakuatsiya qilish, ularga zarur yordam ko‘rsatish va Vatanga qaytarish dolzarb masalaga aylangani ta’kidlandi.
Qayd etilishicha, amaldagi qonunchilikka muvofiq turoperatorlar litsenziya asosida faoliyat yuritadi, turagentlar esa xabardor qilish tartibida ishlaydi. Tahlillar esa aynan turagentlar orqali kafolatsiz safarga chiqqan ayrim turistlar xorijda murakkab vaziyatlarga duch kelayotganini ko‘rsatgan.
Shu munosabat bilan “O‘zbekiston Respublikasi fuqarolarining xorijiy mamlakatlardagi sayohatlarini tartibga solish bilan bog‘liq chora-tadbirlarni yanada takomillashtirish to‘g‘risida”gi normativ-huquqiy hujjat loyihasi jamoatchilik muhokamasiga taqdim etilgan.
Qo‘mita ma’lum qilishicha, loyiha Buyuk Britaniya, Germaniya, Yaponiya, Daniya, Rossiya, Belarus va Qozog‘iston tajribasi asosida ishlab chiqilgan.
Loyihada “Xavfsiz turizm” jamg‘armasini tashkil etish ham nazarda tutilgan. Unga ko‘ra, turoperatorlar uchun belgilanishi rejalashtirilayotgan 50 ming AQSh dollari miqdoridagi mablag‘ favqulodda vaziyatlarda jabrlangan fuqarolarga yetkazilgan zararni qoplash hamda ularni xorijdan evakuatsiya qilish xarajatlarini moliyalashtirishga yo‘naltiriladi. Maqsadli yig‘imlar zaxira mablag‘i belgilangan miqdordan oshgach, ular kafolatli ravishda qaytarilishi qayd etilgan.
Shuningdek, qaror loyihasi joriy yilning 5-iyun va 6-iyul kunlari Turizm qo‘mitasida mahalliy hamda xorijiy turizm sohasi vakillari ishtirokida o‘tkazilgan ochiq muloqotlarda muhokama qilinib, bildirilgan takliflar asosida takomillashtirilgani bildirildi.
Turizm qo‘mitasi mazkur hujjat loyihasi fuqarolarning hayoti, xavfsizligi va qonuniy manfaatlarini himoya qilishning huquqiy hamda moliyaviy mexanizmlarini yaratishga qaratilganini ta’kidlab, jamoatchilikni loyiha mazmunini rasmiy manbalar orqali xolis baholash va muhokamalarda faol ishtirok etishga chaqirdi.
