Farg‘onada hujra tashkil etib, voyaga yetmaganlarga diniy saboq bergan shaxs qo‘lga olindi
Uning oyiga 1,5 million so‘m evaziga 8 nafar voyaga yetmaganga noqonuniy diniy ta’lim bergani aniqlangan.
Farg‘ona viloyatining Oltiariq tumanida noqonuniy diniy ta’lim berish holati aniqlandi. Bu haqda viloyat Ichki ishlar boshqarmasi ma’lum qildi.
Qayd etilishicha, “Xavfsiz va sog‘lom yurt” keng qamrovli tezkor-profilaktik tadbirlari doirasida viloyat IIB hamda Davlat xavfsizlik xizmati xodimlari hamkorligida o‘tkazilgan tezkor tadbirda 1991-yilda tug‘ilgan, Oltiariq tumani Bug‘doychi mahallasida yashovchi fuqaro o‘z xonadonida noqonuniy hujra tashkil etgani aniqlangan.
Tergov ma’lumotlariga ko‘ra, u har bir o‘quvchidan oyiga 1,5 million so‘m haq olib, jami 8 nafar voyaga yetmaganga diniy adabiyotlardan noqonuniy saboq berib kelgan.
Shuningdek, hujrada tashkil etilgan ta’lim jarayonida voyaga yetmaganlarga muntazam ravishda jismoniy va ruhiy tazyiq o‘tkazilgani aniqlangan. Tezkor tadbir davomida diniy adabiyotlar va boshqa ashyoviy dalillar rasmiy tartibda olib qo‘yilgan.
Mazkur holat yuzasidan gumonlanuvchiga nisbatan O‘zbekiston Respublikasi Jinoyat kodeksining 229²-moddasi 2-qismi hamda 110-moddasi bilan jinoyat ishi qo‘zg‘atilib, unga nisbatan qamoq ehtiyot chorasi qo‘llanildi.
Bundan tashqari, hujrada noqonuniy diniy ta’lim olgan voyaga yetmaganlarning ota-onalariga nisbatan Ma’muriy javobgarlik to‘g‘risidagi kodeksning 47-moddasi asosida ma’muriy bayonnomalar rasmiylashtirilgan.
