Buxoro shahrining bosh rejasi tasdiqlandi
Rejaga ko‘ra, hisob davrida shahar hududi 7 966,78 gektardan 11 847,06 gektargacha kengayadi. Magistral ko‘chalarning uzunligi 102,6 kilometrdan 203 kilometrgacha oshiriladi.
Hukumatning 2026-yil 23-iyuldagi 402-son qarori bilan Buxoro shahrining bosh rejasi tasdiqlandi. Bu haqda "Huquqiy axborot" Telegram- kanali xabar berdi.
Hujjatga ko‘ra, hisob davrida Buxoro shahri aholisi 289,19 ming nafardan 385 ming nafargacha, shahar hududi esa 7 966,78 gektardan 11 847,06 gektargacha kengayadi.
Shuningdek, uy-joy fondining umumiy maydoni 4 mln 456,31 ming kvadrat metrdan 8 mln 85 ming kvadrat metrgacha yetkazilishi rejalashtirilgan. Natijada bir kishiga to‘g‘ri keladigan uy-joy maydoni 15,4 kvadrat metrdan 21 kvadrat metrgacha oshadi. Hisob davrida 114,66 ming kvadrat metr uy-joy fondi qisqarishi ham nazarda tutilgan.
Qarorga muvofiq, aholining ijtimoiy soha obyektlariga bo‘lgan ehtiyojini amaldagi me’yorlarga moslashtirish maqsadida madaniy, maishiy va kommunal obyektlar rivojlantiriladi, shuningdek, bo‘sh hududlarda yangi jamoat majmualari barpo etiladi.
Bundan tashqari, magistral ko‘chalarning uzunligi 102,6 kilometrdan 203 kilometrgacha oshiriladi. Birinchi bosqichda bu ko‘rsatkichni 155,35 kilometrga yetkazish rejalashtirilgan. Yiliga 163,8 million yo‘lovchiga xizmat ko‘rsatish quvvatiga ega jamoat transporti tizimini shakllantirish ham bosh rejadan o‘rin olgan.
