Buxoroda 60 dan ortiq fuqaroni chuv tushirgan guruh fosh etildi

Buxoro viloyati IIB Kiberjinoyatlarga qarshi kurashish bo‘limi xodimlari fuqarolarning bank kartalaridagi mablag‘larni o‘g‘irlash bilan shug‘ullangan jinoiy guruh faoliyatini fosh etdi.

 

Dastlabki tergovga ko‘ra, respublikaning turli hududlarida sodir etilgan ushbu jinoyatlar ortida Samarqand viloyatida yashovchi 20 yoshga to‘lmagan yigit va uning boshqa hududlardagi sheriklari turgani aniqlangan.

 

Gumonlanuvchilar qo‘lga olinganda ulardan o‘nlab bank kartalari, SIM-kartalar hamda maxsus mobil qurilmalar ashyoviy dalil sifatida olingan. Tergov organlari ushbu buyumlar guruhning uzoq vaqt davomida yirik miqyosdagi kibero‘g‘riliklar bilan shug‘ullanganini tasdiqlashini ma’lum qilgan.

 

IIB ma’lumotiga ko‘ra, gumonlanuvchilar Telegram orqali boshqarilgan yashirin akkauntlar yordamida fuqarolarning telefonlariga zararli APK fayllarni yuborgan. Ushbu dasturlar qurilmaga o‘rnatilgach, bank ilovalariga oid ma’lumotlar va pul o‘tkazmalarini tasdiqlovchi SMS-kodlar jinoyatchilar nazoratiga o‘tgan. Shundan so‘ng ular jabrlanuvchilarning bank kartalaridagi mablag‘larni o‘zlashtirgan.

 

Talon-toroj qilingan pullarning izini yashirish maqsadida mablag‘lar begona shaxslar nomiga rasmiylashtirilgan tranzit bank kartalari hamda soxta akkauntlar orqali boshqa hisob raqamlariga o‘tkazilgan. Mazkur jinoiy sxema oqibatida respublikaning turli hududlarida 60 nafardan ortiq fuqaro jabrlangan.

 

Holat yuzasidan gumonlanuvchiga nisbatan Jinoyat kodeksining 169-moddasi uchinchi qismi "b" bandi (o‘g‘rilik) bilan jinoyat ishi qo‘zg‘atilgan.

 

Hozirda dastlabki tergov harakatlari davom ettirilmoqda. Shuningdek, ushbu jinoiy guruhga aloqador boshqa shaxslarni aniqlash, ularni javobgarlikka tortish hamda jabrlangan fuqarolarning huquqlarini tiklash bo‘yicha choralar ko‘rilmoqda.