Fransiya va Ispaniyadagi yirik o‘rmon yong‘inlari sabab 87 ming kishi evakuatsiya qilindi

Fransiyaning janubi-g‘arbiy qismi va Ispaniyaning markaziy hududlarida davom etayotgan yirik o‘rmon yong‘inlari oqibatida taxminan 87 ming kishi evakuatsiya qilindi. Tabiiy ofat sabab o‘nlab o‘t o‘chiruvchilar ham jarohat oldi. Bu haqda AP xabar berdi.

 

Fransiyaning Atlantika sohilidagi Kap-Ferre yarimorolida chorshanbadan buyon davom etayotgan yong‘in 125 kvadrat kilometr hududni qamrab oldi. Alangalar sayyohlik hududlariga yaqinlashgani sababli aholi va dam oluvchilar avtomobil hamda qayiq orqali xavfsiz joylarga ko‘chirildi.

 

Fransiyada yana bir yong‘in o‘chog‘i yuzaga kelgani ortidan evakuatsiya hududi kengaytirildi. Natijada Jironda departamentida 44 ming, Land departamentida esa 23 ming kishi evakuatsiya qilindi.

 

Yong‘in oqibatida 53 ta uy va bitta kemping yonib ketgan, 42 nafar o‘t o‘chiruvchi jarohat olgan.

 

Yong‘inni o‘chirish ishlariga yuzlab o‘t o‘chiruvchilar, aviatsiya va maxsus texnikalar jalb etilgan. Fransiya prezidenti Emmanuel Makron mamlakatga Yevropa Ittifoqi davlatlaridan yong‘inga qarshi samolyot va vertolyotlar yuborilishini ma’lum qildi.

 

Ispaniyada esa hukumat tarixda ilk bor o‘rmon yong‘inlari sabab milliy favqulodda holat e’lon qildi. Madrid va Avila provinsiyalaridagi yong‘inlar tufayli qariyb 20 ming kishi evakuatsiya qilindi. Madridning g‘arbiy qismidagi ikkita yong‘in o‘chog‘i birlashib, mintaqa tarixidagi eng yirik yong‘inga aylangani qayd etildi.

 

Shuningdek, Avila provinsiyasidagi yong‘in 90 kvadrat kilometr maydonni qamrab olib, yana 1,5 ming kishining evakuatsiya qilinishiga sabab bo‘ldi. Mamlakatning Gvadalaxara provinsiyasida esa tarixdagi ikkinchi eng yirik o‘rmon yong‘inini o‘chirish ishlari davom etmoqda.

 

Mutaxassislarning ta’kidlashicha, Yevropadagi jazirama, qurg‘oqchilik va kuchli shamollar yong‘inlarning tez tarqalishiga sabab bo‘lmoqda. Olimlar esa iqlim o‘zgarishi mintaqada bunday tabiiy ofatlarning ko‘lami va takrorlanish tezligini oshirayotganidan ogohlantirmoqda.