Ukraina dronlari Sankt-Peterburgga hujum qildi
Hujum ortidan shaharda dron tahdidi e’lon qilinib, mobil internet faoliyati cheklanishi haqida ogohlantirish berildi.
24-iyulga o‘tar kechasi Ukraina dronlari Rossiyaning Sankt-Peterburg shahriga hujum qildi. Bu haqda shahar gubernatori Aleksandr Beglov ma’lum qildi.
Uning so‘zlariga ko‘ra, havo hujumidan mudofaa tizimlari hujumni qaytarishda davom etgan. Dron zarbalari oqibatida Moskva shossesi hududidagi fuqarolik infratuzilmasi obyektlariga zarar yetgan, hodisa oqibatlarini bartaraf etish ishlari olib borilmoqda.
Beglov favqulodda vaziyat bo‘yicha tuzilgan shtab faoliyatini shaxsan boshqarayotganini bildirgan.
Hujum fonida Sankt-Peterburgda dron tahdidi e’lon qilinib, aholiga mobil internet xizmatida uzilishlar kuzatilishi mumkinligi haqida ogohlantirish berilgan.
Shuningdek, xavfsizlik nuqtai nazaridan Pulkovo aeroporti faoliyati vaqtincha to‘xtatilgan. Keyinchalik Rossiya Federal havo transporti agentligi (Rosaviatsiya) aeroport odatdagi ish rejimiga qaytganini ma’lum qilgan.
Leningrad viloyati gubernatori Aleksandr Drozdenko ma’lumotiga ko‘ra, hujum vaqtida viloyat osmonida 50 ta dron urib tushirilgan. Rossiya rasmiylari hujum oqibatlari va yetkazilgan zarar yuzasidan ma’lumotlarni aniqlashtirishda davom etmoqda.
