Andijonda 11 yoshli o‘g‘liga avtomobil boshqartirgan ota jazolandi
YPX tomonidan to‘xtatilgan Spark avtomobili rulida 11 yoshli bola, old o‘rindiqda uning ukasi, orqa o‘rindiqda esa otasi o‘tirgani aniqlandi.
Andijon viloyatining Asaka tumanida viloyat Yo‘l-patrul xizmati xodimlari tomonidan o‘tkazilgan reyd davomida Spark rusumli avtomobil to‘xtatilgan. Tekshiruv chog‘ida transport vositasini 4-sinf o‘quvchisi bo‘lgan 11 yoshli bola boshqarayotgani aniqlangan. Avtomobilning old yo‘lovchi o‘rindig‘ida uning ukasi, orqa o‘rindig‘ida esa otasi bo‘lgan.
Holat yuzasidan transport vositasini boshqarish huquqiga ega bo‘lmagan shaxsga avtomobilni boshqarishga berganligi uchun haydovchiga nisbatan belgilangan tartibda ma’muriy bayonnoma rasmiylashtirilgan.
Shuningdek, Andijon viloyatida o‘tkazilayotgan reydlar davomida haydovchilik guvohnomasisiz avtomobil boshqarish, mast holda rulga o‘tirish va boshqa qoidabuzarliklar ham aniqlanmoqda.
Mas’ullar qayd etishicha, reydlar boshlanganidan buyon 4 mingdan ortiq transport vositasi jarima maydoniga joylashtirilgan. Ular orasida 150 dan ortiq haydovchilik huquqidan mahrum etilgan shaxsning rulga o‘tirgani, 400 dan ortiq haydovchilik guvohnomasisiz avtomobil boshqargani, 100 ga yaqin ruxsatsiz oyna qoraytirish hamda 80 ga yaqin mast holda transport vositasini boshqarish holati qayd etilgan.
