Toshkentning modernizm me’morchiligi YUNESKOning Xalqaro ro‘yxatiga kiritildi
Obyektlar qatorida “Jemchug” turar joy binosi, tarix va san’at muzeylari, “Xalqlar do‘stligi” saroyi, sirk, Markaziy ko‘rgazmalar zali, “Kosmonavtlar” metro bekati, “Quyosh” geliomajmuasi ham bor.
Janubiy Koreyaning Pusan shahrida o‘tkazilayotgan YUNESKO Umumjahon merosi qo‘mitasining 48-sessiyasida Toshkentning modernizm me’morchiligi obyektlari tashkilotning nufuzli Xalqaro ro‘yxatiga kiritildi. Bu haqda Prezident administratsiyasi rahbari Saida Mirziyoyeva ma’lum qildi.
Mirziyoyevaning ta’kidlashicha, bu O‘zbekiston tomonidan so‘nggi 25 yil ichida YUNESKOga taqdim etilgan milliy nominatsiyaning ilk bor shunday yuksak maqomga sazovor bo‘lishidir.
Saida Mirziyoyevaga ko‘ra, mazkur qaror nafaqat bir necha me’moriy obyekt, balki 1966-yilgi zilziladan keyin Toshkentning qayta bunyod etilishi bilan bog‘liq butun bir tarixiy davrning e’tirofi hisoblanadi.
Uning qayd etishicha, o‘sha yillarda poytaxt zamonaviy me’morchilik, Markaziy Osiyo an’analari va mahalliy iqlim xususiyatlarini uyg‘unlashtirgan o‘ziga xos me’moriy qiyofa kasb etgan.
Saida Mirziyoyeva ushbu voqeani O‘zbekistonning xalqaro maydondagi navbatdagi yutug‘i deb baholab, bu boy me’moriy merosni asrab-avaylash va uni kelajak avlodlarga yetkazish yo‘lidagi muhim qadam ekanini ta’kidladi.
