Eldor Shomurodovning goli JCh-2026'ning eng chiroyli 2-goli deb topildi
Shomurodov guruh bosqichining uchinchi turida Kongo DR darvozasiga gol kiritgandi.
O‘zbekiston milliy terma jamoasi sardori Eldor Shomurodovning 2026 yilgi FIFA Jahon chempionatida Kongo DR darvozasiga urgan ajoyib goli FIFA tomonidan o‘tkazilgan “Turnirning eng chiroyli goli” so‘rovnomasida 2-o‘rinni egalladi.
Shomurodov guruh bosqichining uchinchi turida Kongo DRga qarshi uchrashuvning 10-daqiqasida to‘pni darvozabonning ustidan oshirib gol kiritgandi. Ushbu gol muxlislar va futbol mutaxassislari tomonidan mundialning eng chiroyli gollaridan biri sifatida e’tirof etildi.
Eslatib o‘tamiz, mazkur gol avvalroq FIFA muxlislari ovoz berishida Jahon chempionati guruh bosqichining eng chiroyli goli deb topilgan va turnirning umumiy so‘rovnomasiga yo‘l olgandi.
Ma’lumot o‘rnida, ushbu nominatsiya bo‘yicha birinchi o‘rinni Kabo-Verde terma jamoasi futbolchisi Sidni Lopes Kabralning Argentina darvozasiga urgan goli egalladi.
