Pokistonda musson yomg‘irlari qurbonlari soni 107 nafarga yetdi
Meteorologlar hafta o‘rtalaridan boshlab yana kuchli yog‘ingarchilik kuzatilishi mumkinligidan ogohlantirmoqda.
Pokistonda musson mavsumi boshlanganidan buyon kuzatilayotgan kuchli yomg‘ir va toshqinlar oqibatida kamida 107 kishi halok bo‘ldi, 344 kishi jarohat oldi, yuzlab uylar zarar ko‘rdi. Bu haqda mamlakatning Tabiiy ofatlarni boshqarish milliy boshqarmasiga (NDMA) tayanib, Al Jazeera xabar berdi.
Qayd etilishicha, eng ko‘p qurbon Xayber Paxtunxva viloyatida qayd etilgan bo‘lib, u yerda 55 kishi halok bo‘lgan. Panjob viloyatida esa 36 kishi tabiiy ofat qurboniga aylangan. Halok bo‘lganlarning yarmidan ko‘pi uylar va tomlarning qulab tushishi oqibatida vafot etgan.
Panjob viloyati markazi Lahorda suv toshqinlari sabab evakuatsiya qilingan aholini vaqtincha joylashtirish uchun kamida 17 ta qutqaruv lageri tashkil etilgan.
Mahalliy rasmiylarning ma’lumotiga ko‘ra, Lahor va Gujranvala hududlarida qariyb 400 kvadrat kilometr maydon suv ostida qolgan. Vaziyat "ichki dengiz"ni eslatayotgani ta’kidlangan.
Panjob bosh vaziri Maryam Navoz Sharif favqulodda vaziyat xizmatlari butun viloyat bo‘ylab safarbar etilgani va toshqin suvlarini chiqarish ishlari davom etayotganini bildirdi.
Pokiston Meteorologiya departamenti seshanbagacha toshqin keltirib chiqaradigan darajadagi yog‘ingarchilik kutilmayotganini, biroq chorshanbadan boshlab Islomobod, Yuqori Panjob, Pokiston nazoratidagi Kashmir, Xayber Paxtunxva va Gilgit-Baltiston hududlarida yangi nam ob-havo davri boshlanishi mumkinligini ma’lum qildi.
Shuningdek, Ravi daryosida suv sathi o‘rta darajadagi toshqin ko‘rsatkichiga yetgani, mamlakatdagi aksariyat yirik daryolarda esa suv miqdori me’yoriy yoki past darajada ekani qayd etildi.
Mutaxassislar aholini pastqam hududlardan uzoqroq bo‘lishga chaqirmoqda. Ularning ta’kidlashicha, musson mavsumi hali o‘rtasiga yetgan bo‘lib, u sentyabrgacha davom etishi kutilmoqda.
2025-yilda Pokistondagi kuchli toshqinlar oqibatida 1 037 kishi halok bo‘lgan, 2 million kishi o‘z uyini tark etishga majbur bo‘lgan, millionlab chorva mollari nobud bo‘lib, qishloq xo‘jaligiga katta zarar yetgan.
