Ugandada ochlikdan 19 kishi vafot etdi
Rasmiylar yaqin ikki oy davomida 9 400 tonna oziq-ovqat yordamini aholiga yetkazishni rejalashtirmoqda.
Uganda hukumati mamlakat sharqidagi Karamoja mintaqasida ochlik oqibatida kamida 19 kishi vafot etganidan so‘ng favqulodda oziq-ovqat tarqatishni boshladi.
Ma’lum qilinishicha, uzoq davom etayotgan qurg‘oqchilik tufayli Karamoja mintaqasida kutilgan yog‘ingarchilik kuzatilmagan, natijada hosil nobud bo‘lgan va 1,5 millionga yaqin aholi keskin oziq-ovqat tanqisligi hamda to‘yib ovqatlanmaslik muammosiga duch kelgan.
Ochlikdan erta ogohlantirish tizimlari tarmog‘i (FEWS NET) mintaqadagi vaziyat inqiroz darajasiga yetganini qayd etgan.
Rasmiylar moliyalashtirishdagi qiyinchiliklarga qaramay, yaqin ikki oy davomida 9 400 tonna oziq-ovqat yordamini aholiga tarqatishni rejalashtirmoqda. Bu hukumat tomonidan yordam hajmi qisqarganidan keyingi ilk yirik gumanitar operatsiya hisoblanadi.
Mutaxassislarning ta’kidlashicha, Karamoja so‘nggi yillardagi eng kuchli qurg‘oqchiliklardan birini boshdan kechirmoqda. Aprel oyidan buyon sezilarli yog‘ingarchilik kuzatilmagani sababli fermerlar hosildan deyarli ayrilgan.
