Namanganda daryoda cho‘kib ketgan bir nafar fuqaroning jasadi topildi
Joriy mavsum davomida cho‘milish taqiqlangan hududlarda suvga tushish oqibatida bir necha kishi halok bo‘lgan.
Ijtimoiy tarmoqlarda Namangan hududidan oqib o‘tuvchi Sirdaryo daryosida fuqarolarning cho‘kishi bilan bog‘liq xabarlar tarqaldi.
Namangan viloyati Favqulodda vaziyatlar boshqarmasi ma’lum qilishicha, 2026-yil 26-iyul kuni soat 14:06 da 112 qisqa raqamiga Namangan shahri “Gulbog‘” MFYda yashovchi, 2004-yilda tug‘ilgan fuqaro Sirdaryoning Namangan tumani “Sho‘rqo‘rg‘on” MFY hududidan oqib o‘tuvchi qismiga tushib ketgani haqida murojaat kelib tushgan.
Mazkur holat yuzasidan FVV viloyat boshqarmasi Maxsus qutqaruv otryadining suvda qutqaruv guruhi g‘avvoslari tomonidan qidiruv-qutqaruv ishlari olib borilmoqda.
Shuningdek, 27-iyul kuni boshqa bir fuqaroning jasadi daryodan topilib, qutqaruvchilar tomonidan qirg‘oqqa olib chiqilgan va tegishli tartibda topshirilgan.
FVV ma’lumotlariga ko‘ra, joriy mavsum davomida cho‘milish taqiqlangan hududlarda suvga tushish oqibatida bir necha kishi halok bo‘lgan. Hozirda ham bunday hududlarda cho‘kib ketgan ikki nafardan ortiq fuqaroni qidirish ishlari davom ettirilmoqda.
Mutasaddilar fuqarolarni, ayniqsa ota-onalarni farzandlarini nazoratsiz ravishda suv havzalariga yubormaslikka chaqirdi. Shuningdek, faqat ruxsat etilgan va xavfsiz cho‘milish joylaridan foydalanish hamda suvdagi xavfsizlik qoidalariga rioya qilish tavsiya etildi.
