Suv xo‘jaligida sog‘lom va zamonaviy boshqaruv tizimi joriy etilmoqda
Yangi tizim doirasida suv infratuzilmasi loyihalari yagona elektron platformaga o‘tkaziladi.
Ichimlik suvi sohasini samarali boshqarish va zamonaviy tizimga aylantirish maqsadida bir qator yangi mexanizmlar joriy etiladi.
2026-yil sentyabr oyidan boshlab barcha suv infratuzilmasi loyihalari yagona elektron platformada aks ettiriladi. Shuningdek, yer osti suvlari holati bo‘yicha ma’lumotlar ham ushbu tizimga integratsiya qilinadi.
Bundan tashqari, avtomobil yo‘llarini qurish va ta’mirlash jarayonida yo‘l ostidagi suv kommunikatsiyalarini rekonstruksiya qilish ishlari oldindan loyiha hujjatlariga kiritiladi. Bu esa keyinchalik yo‘llarni qayta qazish bilan bog‘liq muammolarni kamaytirishga xizmat qiladi.
“O‘zsuvta’minot” AJda raqamlashtirish va sun’iy intellekt texnologiyalarini joriy etish bo‘yicha boshqaruv raisi o‘rinbosari lavozimi tashkil etiladi.
Shuningdek, 2027-yildan boshlab tariflarni tasdiqlash vakolati Idoralararo tarif komissiyasiga o‘tkaziladi. Byudjet tashkilotlari uchun yagona tariflar joriy etilishi hamda sohaga xususiy sektor investitsiyalarini jalb qilish rejalashtirilmoqda.
Mutasaddilarga ko‘ra, mazkur chora-tadbirlar byudjet mablag‘laridan samarasiz foydalanishning oldini olish, korrupsion xavflarni kamaytirish va suv ta’minoti tizimida ochiqlikni ta’minlashga xizmat qiladi.
